Kalaallit nipilersugaat taperneqartut
212.000 kronit nunatsinni nipilersornikkut suliniutinut qulinut agguaanneqarput.
Nipilersukkat tamanit tusaaneqarsinnaasumik atorneqaraangata Gramex erinarsortartut, nipilersortartut nuusiorfiillu sinnerlugit aningaasanik pissarsiniartartoq aamma nunatsinni nipilersornermut tapiissuteqartarpoq.
– Ukioq manna suliniutit qulit tapiiffigineqartut assigiinngitsorujussuupput: kalaattuunik cd-liat, juullimut nipilersukkanik immiussinerit, nipilersorluni vidioliat titartakkat, rockfestivalimilu peqataanermut. Tamassuma naqissuserpaa aningaasat kalaallit nipilersugaliaat tusagassiutini atorneqaraangamik uteqqittarmata, nunatsinnilu nipilersornerup tamatigoortuunissaa qulakkeerlugu, Gramesimi takussutissiinermut pisortaq Anette Kure Corneliussen oqarpoq
Grameximut qinnuteqaatinik nunatsinneersunik naliliisartunut ilaasortaapput Rasmus Lyberth aamma Aviaaja Lumholt. Grameximi kulturimut tunngasunik sulialinnut qinnuteqaatit innersuuttarpaat, taakkulu naggataarutaasumik naliliisarput.
Aqqaneq marluk qinnuteqarput qulillu tapiiffigineqarlutik.