Kalaallit Nunaat pillugu filmiliaq nutaaq saqqummingajalerpoq
Kalaallit Nunaanni pinngortitarsuaq qallunaanit paasisaqarfigineqarsinnaalerpoq. Piviusulersaarut 'Nunarsuup isuanut ilisimasassarsiorneq' februaarimi takuteqqaarneqassaaq
Umiarsuup Activip 2011-mi Tunup avannaarsuanut angalanera Danmarkimi filmertarfinni 50-ini takuteqqaarneqangajalerpoq. Filmi aamma Nuummi takutinneqarumaarpoq.
Taama facebook-gruppe Arktisk Update ilisimatitsivoq.
Filmi nunarsuarmi tikinneqarsimanngitsunut kingullernut ilisimasassarsiorneruvoq alutornartoq misigisassarsiorfiusorlu.
Umiarsuaaraq pingasunik napparutilik eqqumiitsuliortunik, ilisimatuunik anguniakkanillu ulikkaartoq Noahp Columbusilluunniit kissaataanit ajornerunngitsoq ilaaffigalugu nunarsuup isuanut angalasoqarpoq: Tunup avannaarsuani sikunut aakkiartorasuartunut.
Angalaneq alutornarluinnartuuvoq, tamatumanilu angalasunit tupeqarfiit, nannut uumasorlu nutaarluinnaq naapinneqarput. Nunarsuattali ilisimaneqanngitsortaanik nutaanik naapitsinerminni inuttat ilaatigut tassaasut eqqumiitsuliortut Tal R aamma Daniel Richter ujarassioorlu Minik Rosing apeqqutinik tunngaviulluinnartunik pilersitsipput.
Filmimi filmiliornermik piginnaaneqarluartumit Daniel Dencikimit assilissat alutornarluinnartut tulleriiaat atorlugit tiguaasumi inuiaassutsimi oqaluttuarisaanermut tunngasunut ingerlanneqarpugut alapernaassuseq, pilerissuseqarneq oqiliallannartumillu quiasaarumatussuseqarneq akuliullugit. Nukappiaqqap takorluugatoqaatut inersimasunik peqateqarluni piviusunngortinneqartumi filmi eqqarsaatigilluagaallunilu suliarilluagaavoq.
Filmimut qilanaartuut takusinnaavat uani.
- Assilisat atorlugit oqaluttuat pikkunarnerpaartaannik suliaqarusuppunga najuunnermillu misigisimaneq pilersikkusullugu. Aamma allanngornerujussuup sermersuaqarfiup kingulliup naanerata pilersitaa ersersinniarlugu ilaasorpassuit isumassarsinartut tunngaviinik atuiniarpunga; silap pissusaata allanngorneranik ersiortitsinermiunngitsoq, kisiannili kinguaariinnut tulllinnguuttussanut isumassarsiorfissatut, Michael Haslund-Christensen, filmimut tunuliaqutaasoq Tunumut aallarnissaq sioqqullugu allappoq.