Kalaallit Nunaat Sorte Diamantimi
Sørine Steenholdt, Kim Leine aamma Nukâka Coster-Waldau Københavnimi Kongelige Bibliotek pulaassavaat. Assiliisup Henrik Saxgrenip saqqummersitani 'Ultima Thule' takutissavaa.
Kalaallit Nunaat, Issittoq aamma sermersuaq aakkiartortoq. Arctic Imaginationimi aaqqissuinermi taakku sammineqassapput, taanna Københavnimi Kongelig Bibliotekip aamma Nunani Avannarlerni USA-milu bibliotekit angisuut aaqqissorpaat.
- Arctic Imagination - eqqumiitsuliortut sermersuup aakkiartorneranut aamma Atlantiku akimorlugu silaannaap kiatsikkiartornera pillugit isumassarsiorneq, nittartakkaminni taama oqaatigaat.
Københavnimi Sorte Diamantimi Henrik Saxgrenip assiliinermi suliniutini 'Ultima Thule' sisamanngorpat tulliani saqqummiutissavaa, tassani atuagaq aamma saqqummissaaq.
Taassuma suliniut 2014-imili suliarilerpaa, tassani piniartarneq assiliivimminik misissorpaa.
- Naak piniartut ullumikkut kiassakkanik imermillu kuuginnartumik aamma interneteqartunik illoqaraluartut, Thulep eqqaa suli immikkut ittumik inuuffigiuminaattuuvoq, piniartut imaani miluumasut piniaraangamikkit ukiut tusintilikkaat matuma siorna siuaasaat inuugallarnerannut allaanerujussuunngilaq. Sikup peerukkaluttuinnarnera ajornartorsiutaaginnaarpoq, Henrik Saxgrenip suliniutinut pillugu allappoq.
Nukâka Coster-Waldau tamatumunnga atatillugu kalaallit oqaluttuatoqqanik nipituumik atuaassaaq.
Maajip 15-anni Sørine Steenholdtip aamma Kim Leinep tusagassiortoq Adam Holm oqaloqatigissavaat.