Kalaallit Nunaat Tivolimi 2025-mi assit takukkit
Pikialaartitsineq Kalaallit Nunaat Tivolimi naammasseqqammerpoq. Københavnip qeqqani ullut marluk ingerlanerini aaqqissuussat kulturimut tunngassuteqartut, tusarnaartitsinerit ataatsimoorlunilu nuannisaqatigiinnerit pipput.
Kalaallit Nunaat Tivolimi kalaallit ilinniartut 1976-imi naapiffiattut aallartittoq ukiumoortumik maanna aqqissuunneqartarpoq.
Assi: Jakob Melgaard / Tivoli
Kalaallit Nunaat Tivolimi Københavnimi juulip 31-ani aggustillu aallaqqaataani pisarnertut pivoq.
Kalaallit Nunaat Tivolimi 1976-imiilli ukiut tamaasa aaqqissuunneqartarpoq. Aaqqiissuussaq Kalaallit Nunaata avataani kulturikkut pisartut annersaraat.
Kalaallit Danmarkimiittut aaqqissuussamut peqataajartortartut saniatigut qallunaat allallu Kalaallit Nunaannik soqutiginnittut pisunut aamma peqataasarput.
Qaannamik kinngusaarnermik takutitsisoqarpoq. Nunatsinni pissartaq Ivinnguaq-Ane A. Olsen Tivolip tasiani piginnaasaminik takutitsivoq.
Assigiinngitsunik tuniniaasoqarpoq, saqqummersitsisoqarluni workshoppertitsisoqarlunilu. Taamaalilluni Kalaallit Nunaat pillugu assigiinngitsunik paasisaqarnissamik periarfissaqarluni. Najuuttunut minnernit annernut.
Soorunami aamma nipilersortoqarpoq, ilaatigut Rasmus Lyberth aamma Julie Berthelsen appisimaartuullutik.
– Kalaallit Nunaat Tivolimi kalaallit angerlarsimasutut misigiffigisarpaat. Kalaaleqatit naapinneqartarpat, Tivolilu nuannaarfiusarluni, Julie Berthelsen tusarnaartitsinissaq sioqqullugu oqarpoq.
Tallimanngornermi tusarnaartitsineq nipilersoqatigiit qallunaat tv-2-kkut naggaserpaat. Taakku Kalaallit Nunaannut qanimut attaveqartartutut nalunnginneqarput, nunamullu tikeraakulasarlutik.
Takusinnaasatsitut Tivolimut tusarnaariat amerlapput.
