Kalaallit Nunaat Tivolimi ingerlanneqalerpat kulturikkut sammisassat arlaqarput
Kalaallit Nunaat Tivolimi ataasinngorpat aallartissaaq. Kulturimi ileqqullu pillugit sammisassat amerlanerussasut, Tivoli ilisimatitsivoq.
Nunatsinniit eqqumiitsulianik saqqummersitsinerit, qamutit, isiginnaartitsinerit, nunatsinniit nioqqutissat nipilersortullu taakkuupput Kalaallit Nunaat Tivolimi ingerlanneqalerpat misigineqarsinnaasut.
Tivolimi 31. juli aamma 1. august nunatsinniit sammisassaqartitsisoqalerpat nunatsinniit nioqqutissanik pisisoqarsinnaassaaq, uaajeertunik isiginnaartoqarsinnaalluni kulturikkullu pikialaartitsisoqassalluni.
- Ulluni marlunni pisussani Kalaallit Nunaanniit kulturi pillugu paasisaqarnerusinnaavutit. Kalaallit Nunaannit nipilersortartut tusarnaartitsissapput, isiginnaartitsisoqassaaq nioqqutissanillu tuniniaasoqassalluni.
- Kalaallit Nunaannit kulturi ileqqullu ilinniarfiginerusinnaassavatit, ukioq manna sammisassat amerlanerummata, GiT pillugu Tivoli nittartakkamini allappoq.
Nipilersukkat nutaat nutaanngitsullu
Ileqqut malillugit Tivolimi 31. juli aamma 1. august tusarnaartitsisoqassaaq.
Nipilersortartut nutaanerusut aamma ukiut arlallit nipilersortartooreersut tusarnaartitsissapput.
Ukioq manna appittussat:
- Siissisoq
- Qarsoq
- Tulleriit
- Tarrak
- INUANIMA
- Small Time Giants
- Koret Inngeratsiler
Tivolimi 15-inik ukiulik Milan Mathæussen, Avannaata Qimussersuani ajugaasimasoq aamma nersorniarneqassaaq.
Tivoli ilisimatitsivoq marlunngornermi 1. august nal. 18.00 tupaallatsitsisoqarumaartoq.
Tivolip nittartagaani aamma Grønland i Tivolip Facebookimi quppernerani pilersaarutit pillugit atuarnerusinnaavutit.