Kalaallit Nunaata Brahmsip erinniarsualiaanik tusarnaartitsisoqarnermi Tyskland tusarnaartitseqatigissagaa

Europamiut aliannaarsaartarnerat kalaallillu kulturiat Nordisk Koncertkor Katuami oktobarip 19-ani tusarnaartitseqqilerpat naapissapput. Tamatumuuna erinarsoqatigiit tyskit Wilhemshavenimeersut erinarsoqatigissavaat.

Kalaallit Nunaata oqaluttuarisaanerani siullerpaamik Johannes Brahmsip erinniarsualiaa “Ein tschechisches Requiem” issittumi tusarnaartitsissutigineqassaaq.

- Tamanna Kalaallit Nunaata kulturikkut nunarsuarmi tusaamasaanerulernissaanut iluaqutaassaaq, Nordisk Koncertkorimi siulittaasoq Mads Faber AG-mut oqarpoq.

Erinarsoqatigiit “Ein Deutschs Requiem” (kalaallisut: tyskisut toqusumik naalagiussissut) Johannes Brahmsimit 1860-ikkunni erinniarineqartoq tusaamasaalluinnarpoq. Aliasunneq neriunnerlu pillugit erinarsuutitut killitsinnartutut angingaartutullu taaneqartarpoq, inuit qanorluunniit upperisaqaraluarpata misigissusaannut toqqaannartumik eqquisartoq.

Aliannaarsaarnerup nalaani erinniarsuaq kalaallillu ileqqutoqaat naapinneranni paukit (tumerparpaarsuit, aaqq.) kalaallit qilaataannik taarserneqarpata nipilersuut allatorluinnaq nipeqalissaaq

Nipilersoriaatsit marluk naapittut

- Amerlanatik erinarsoqatigiinnit Wilhemshavenimit suliniummi peqataarusunnerluta januaarimi saaffigineqarpugut, periarfissarlu tamanna atorluarumavarput, Mads Faber oqarpoq.

Kammerchor Wilhelmshaven Tysklandimi apostuulit nutaat oqaluffiannut attuumassuteqarpoq. Erinarsoqatigiit a cappellamik (nipilersuutit atornagit erinarsorneq, aaqq.) erinarsortarnertik pillugu ilisimaneqartut erinniarsuarniit nutaalianut atuisinnaapput.

Inuit Tysklandimeersut 50-it missaanniittut Nordisk Koncertkor tusarnaartitsilerpat nunatsinnut tikissapput, suliniummilu Gerrit Junge Tysklandimeersoq aqutsisuullunilu ilitsersuisuuvoq.

Uummannami meeqqat illuanneersut aamma erinarsuummik atuiumaaramik piffissat nipilersoriaatsillu marluk naapippata misigisaqartitseqataajumaarput.

Qilaatit Uummannami meeqqat illuanneersunit atorneqarumaarput, akunniliinerminnilu Brahmsip erinniarsualiai illuatungilerlugit namminneq erinarsuusiatik atorlugillu qangatut qiteriaatsimik qitikkumaarput.

Nipilersoriaatsit marluk naapikkuni annaasaqarneq tuppallersarnerlu pillugit nipilersuutinik atuiumaarput.

- PIffissami aalajangersimasumi suleqatigiinneruvoq. Tamanna siornatigut nunarsuarmi misilinneqarnikuunngilaq, Mads Faber oqarpoq.

Kalaallit Nunaat nunani tamalaani ilisimaneqalersoq

Tyskit erinarsoqatigiivinit 50-it missaanniittut peqataassapput, Nuuk Nordisk Koncertkor-imiillu 20-t missaanniittut peqataassallutik. Tassa inuit 70-it missaanniittut nunani tamalaani kulturikkut paarlaasseqatigiinnissami peqataassapput.

- Ullumikkut nunarsuarmi avissaartuuffiungaartut amerlavallaartut isumaqarpunga. Kiisami ataatsimoortitsisumik aaqqissuussisoqarpoq. Tamanna pisariaqartilluinnarsimavarput, Mads Faber oqaluttuarpoq.

- Kulturit ataatsimoornissaat pissangageqaara. Aaqqissuussineq pingaaruteqartorujussuuvoq. Inuttut avissaartuutsitsisunit amerlanerusunik ataasiussuseqartarpugut. Aaqqissuussinermi taamaattumi inuit imminnut asannittut pillugit oqaluttuanik nuannersunik saqqummiussisinnaalluta takutissinnaagipput isumaqarpunga, taanna oqarpoq.

Tusarnaartitsinerup saniatigut erinarsoqatigiit nipilersuuteqanngitsumik erinarsorlutik naapissapput, aamma Ute Engelke Manfred Bittnerilu erinarsornermik ilinniartitsissapput. Taakkua Europami erinarsornermik ilinniartitsineq kalaallit torlorsornerannut assersuuppaat.

Brahmsip kingorna inuuneq

“Ein deutsches Requiem” erinarsoqatigiinnit erinarsorneqartartuni piumasaqaateqarfiunerpaatut isigineqartarpoq. Takisuujunermigut, pisariusumik erinarsorneqartussaanermigut killitsinnartunillu taallaqarnermigut erinarsoriaatsinut, erinnisaarnissamut kiisalu erinarsoqatigiit, kisimiillutik erinarsortartut nipilersoqatigiissuillu suleqatigiinnissaannut piumasaqaateqarpoq.

- Erinarsortakkatsinniit allaniit annerullunilu sapernarneruvoq, Mads Faber oqarpoq.

Kikkulluunniit Nuuk Nordisk Koncertkorimi peqataasinnaapput, sungiusarnermullu takuttoqaannarsinnaavoq.

- Inoqarpoq unnuk ataaseq peqataariarlutik takkuteqqinngitsunik. Taakkulu tusarnaartitsereernerup kingorna ajornannginnerulissammat takkuteqqeqqullugit oqarfiginikuuakka. Inunnik qimaatitsissanngikkutta Brahmsip kingorna inuuneqartoq eqqaamassallugu pingaaruteqannguatsiarpoq, taanna oqaluttuarpoq.