Kalaallit Nunaata Canadallu suleqatigiinnissamut isumaqatigiissutaat pingaarutilik atsiorneqarpoq

Kalaallit atuakkiaat Canadami Quebecimi ilisimaneqarlualissapput. Aamma franskisuunngortinneqarnissaat sulissutigineqalissaaq. Kalaallit Nunaata Quebecillu akornanni aamma atuakkiortunik paarlaasseqatigiilluni ikioqatigiittoqalissaaq.

Isumaqatigiissut arfineq-marlunnik immikkoortortaqarpoq, suleqatigiillutik piviusunngortinniassallugit.

Juaaka Lyberth aamma Katti Frederiksen ulluni apriilip 12-aniit 14-anut Parisimeeqqammerput, tassani Festival du Livre de Parisimi peqataallutik. Peqataanerminni oqaluttuarisaanermi pingaarutilimmik isumaqatigiissuteqarput.

- Kalaallit Atuakkiortut sinnerlugit atsiortuuvoq siulittaasoq Juaaka Lyberth, Département d’études littéraires Université du Québec à Montréal sinnerlugu atsiortuuvoq direktøre, professor, Daniel Chartier, Kalaallit Atuakkiortut tusagassiuutitigut nalunaarummi allappoq.

Nittartartagaq inerisarneqassaaq

Inuit Atuakkiaasa Nittartagaata, inuit.uqam.ca ineriartortinneqarnissaa suleqatigiissutigineqarnissaa aamma isumaqatigiissutaavoq. Franskisut, kalaallisut aamma danskisut atuartartut, oqaatsitsik atorlugit paasissutissanik nittartakkami atuarsinnaanissaat nittartakkami anguniarneqassalluni.

- Danielip uangalu sinaakkutaasumik isumaqatigiissuterput iluarisimaartorujussuuvarput. Isumatigiissutip immikkoortortaasa qanoq piviusunngortinneqarnissaat oqaloqatigiissutigilereerparput. Daniel Chartierip isumaqatigiissut oqaluttuarisaanermut pingaarutilittut taava, universititimilu ilisimatusarnermi sulinerminni siunissami ukiunut arlalinnut ilaatinneqarnissaa kissaatigalugu, Juaaka Lyberth oqarpoq nangillunilu:

- Kalaallit atuakkiaat nunani allani soqutigineqartorujussuupput. Isumaqatigiissullu una aqqutigalugu atuartartut franskisut oqaluttut Quebec-iinnaanngitsumi aammali Kalaallit Atuakkiortut Frankrigimiittut appakaaffiginissaannut alloriarneruvoq annertooq. Kiisalu aamma nunatta Quebecillu akornanni atuakkiortut paarlaasseqatigiinnikkut atuakkioriarsinnaalernissaat ammaanneqassaaq. Taamaattumik angusaq angisoorujuussoq. Siunissami takorloorluarneqarsinnaavoq Quebec Nunarpullu ’inuit atuakkiaannik’ saqqummersitseqatigiittalersut aamma ’First Nationit’ (indianerit) atuakkiaannik ilaqarluarsinnaasumik.

Atuakkat nunguttut

Kalaallit Atuakkiortut naapertorlugit Juaaka Lyberthip Katti Frederiksenillu atuakkat Parisimut nassataat tamakkerlugit pisiarineqarput.

- Festival du Livre de Parisimi 12-14 april KA-GreenLit-ip peqataanera iluatitsiffiulluarpoq.  Atuakkat saqqummersinneqartut soqutigineqaqaat, tuniniagassatullu nassatat tamarluinnangajammik tunisaallutik. 

Katti Frederiksenip atuakkiaa ”Issittumi aputip naasunngua” franskisut nutserlugu nutaarsiassatut nassarneqartoq, soqutigineqartorujussuusoq ilanngullugu allaaseraat. Franskinullu nuannaaqalutik pisiniartunut Kattip atuagarpassuit atsiortiterpai.

- Maanna Parisimi misilittagaqarlualerpugut, tullissaanut atuarluarsinnaasatsinnik. Aamma Det Danske Husip Parisimiittup sulisua oqaloqatigillualereerparput aappaagu Festival du Livre de Pariseqaqqilerpat, atuakkialeraluta allatullu kulturikkut Det Danske Husemi aaqqissuussilluta unnussiuaartitsisinnaanissatsinnut, Juaaka Lyberth naggasiivoq.