Kammagiitta: Pimmatiginnittarneq ukiut 14-it tamaviaarluni akiorniarneqarpoq sulili tamaviaartoqartariaqarpoq
Kalaallit Nunaanni inersimasut, ulluinnarni meeqqanik assigiinngitsutigut sullissisuusut ukiut qulikkaat sinnerlugit qulakkeerniarsaralugu sulissutigaat meeqqat toqqissillutik pimmatigineqaratik inuuneqarsinnaaqqullugit. Maammali Kammagiittamik suliniutillit nassuerput pimmatiginnittarneq suli ajornartorsiuterujussuusoq.
Pimmatiginnittarneq akiorniarlugu suliniut Kammagiitta - Fri for Mobberi 2010-mi Kalaallit Nunaanni atulersinneqarpoq, nunalu tamakkerlugu siaruaqqalluni.
- Pimmatiginnittarneq ajoraluartumik suli ajornartorsiutaavoq – aamma Kalaallit Nunaanni. Taamaammat Ilinniartitaanermut Aqutsisoqarfik Isumaginninnermullu Aqutsisoqarfik Mary Fonden aamma Red Barnet peqatigalugit Kalaallit Nunaanni qinngasaarisarnermik akiuineq peqatigiillutik annertusaaffiginiarpaat. Tamanna qinngasaarisarnermut akiuinermi suliniut Kammagiitta aqqutigalugu ingerlanneqassaaq, ilinniartitaanermut aqutsisoqarfimmit tamanna nalunaarutigineqarpoq.
- Pimmatiginninnikkut ataatsimoorfinniit ajattuisarneq immikkoortitaasunut kingunipiloqartarpoq, pimmatiginniffiusumilu eqimattani sunniuteqalertarluni. Meeqqat imminnut naleqartinnerannut inuunermillu nuannarinninnerannut sunniuteqartarpoq, taamaattumik annertunerusumik iliuuseqarfiginiarparput. Taamaammat nuannaarutigaarput pinaveersaartitsinissap nukittorsarnissaa suliniuteqarfiginissaalu annertunersumik suliniuteqarfigisinnaalernera, oqaaseqarpoq Kaali Olsen, Ilinniartitaanermut Aqutsisoqarfimmi Pisortaq.
Suliniut imarisaatigut kivinneqassaaq
Suliniut kalaallisuumut nutserneqarnikuuvoq, qallunaat suliniutaanniit Fri for Mobberimiit. Mary Fondi aamma Red Barnet Fri for Mobberimik ingerlatsisuupput, Danmarkimi nuna tamakkerlugu meeqqanut 0-9 ukiulinnut atuuttuulluni. Ole Kirk’s Fondia aningaasatigut Fri for Mobberimik suleqataavoq.
Suliniummik nalilersuineq 2020-meersup takutippaa, suliffeqarfiit Avannaani-, Kujataani-, Kitaani- aamma Kalaallit Nunaata Kangiani sulisuusunit 82 procentiisa atortaraat. Aammattaaq 75 procentiisa misigisarpaat suliffimminni ajunngitsumik kinguneqartartoq.
Annertunerusumik suliniummik ineriartortitsineq neriuuteqartitsivoq, sulinerup suli kivinneqarnerunissaanik taamaasiornikkullu pimmatiginnittarnermut pinaveersaartitsineq nukittorsarneqassalluni. Suliniut Kalaallit Nunaanni Nuna tamakkerlugu pimmatiginnittarneq akiorniarlugu periusissiamut ilaavoq, ilinniartitaanermut aqutsisoqarfimmit oqaatigineqarpoq.
Inatsisartut 2019-imi aalajangerpaat Nuna tamakkerlugu pimmatiginnittarneq akiorniarlugu periusissiortoqassasoq. Periusissiami innersuussutigineqarpoq meeqqanut suli atualinngitsuni meeqqallu atuarfianni nukarlerni atuartunut pinaveersaartitsinermi Kammagiitta atorneqassasoq aammalu isumassarsiorfigineqassasoq.
Sermitsiaq.AG-mit sulissutigaarput ilinniartitaanermut aqutsisoqarfimmi pisortaq Kaali Olsen suliniummik kivitsinissami periutsit suut atorlugit meeqqat akornanni pimmatiginnittarneq akiorniarlugu sulineq ingerlateqqinneqassanersoq paasiniaaffiginiarlugu.