Kangiata Illorsuani Iluliarmiu pisortanngussaaq
Karl Sandgreen Kangiata Illorsuani juunip aallaqqaataani pisortanngussaaq.
Elisabeth Momme soraarninngulerpoq, Kangiatalu Illorsuani Karl 'Aakattak' Sandgreen pisortanngussaaq.
Ilulissani Kangiata Illorsua juunip aallaqqaataani nutaamik pisortartaassaaq, Elisabeth Momme ukiut pingasut atorfimmeereerluni juunip aallaqqaataani soraarninngorniarluni aalajangernera pissutigalugu.
2021-mi paasisassarsiorfiup ammarneraniilli Elisabeth Momme pisortaavoq, suliniutaalu pillugit Greenland Visitor Centerimit, Kalaallit Nunaanni takornarianut sullissivinnik arfinilinnik ingerlatsisumit, nersualaarneqarluarpoq:
- Piffissami imaannaanngitsumi paasisassarsiorfik kusanaqisumik Elisabethip aallarnisarsimavaa. Paasisassarsiorfiup ingerlanneqarnerani ilisarnaataasussatut aalajangiunneqarsimasut tassaasut: Pitsaassuseq, piujuartitsisinnaassuseq, tikikkuminassuseq ataatsimooqatigiinnerlu piviusunngortissimavai, Greenland Visitor Center tusagassiuutinut nalunaarummi allappoq.
Nunatsinni pinngortitap inuillu ataqatigiinnerat pillugit ilinniutissanik paasisassarsiorfiup pilersitsineranut Elisabeth Mommep aqutsisuusimanera pillugu aamma nersualaarneqarpoq.
Karl Sandgreen juunip aallaqqaataani Ilulissani Kangiata Illorsuani pisortanngussaaq.
Assiliisoq: Greenland Visitor Center
-Juunip aallaqqaataani pisortanngortussaq ivertinneqarpat paasisassarsiorfimmi sulisut aalajangersimasumik atorfillit sisamaasut nunaqavissuinnarnik inuttaqartussangornera Elisabethip aamma sulissutigisimavaa, aamma allaqqavoq.
Pisortaq nutaaq pillugu Greenland Visitor Center ima paasissutissiivoq:
- Karl amerlanernit Aakattammik taagorneqartoq ukiorpassuarni akunnittarfinni sulisuusimavoq, pisortatullu misilittagaqarluarluni takorniariartitsinerup nunatsinni piorsarneqarnerani aamma akuulluartuulluni. Sulisoqatigiit ikioqatigiillutik suleqatigiinnissaat kiffartuussinermilu tungiuineq immikkut ilisimasaqarfigivai. Aakattaap taamalilluni suliffittaamini Ilulissat nunarpullu kusanartumik avammut kiinnersittarnerat ingerlateqqittussanngorpaa.
