Karina Møller avissaarnissaq pillugu: Danmark atuuffigisimasani nassuerutigisariaqarpaa
Kalaallit Nunaat Danmarkilu piviusumik naligiilissappata, Kalaallit Nunaata nunasiaatinngortinneqarnerani periuserineqarsimasup Danmarkimit paasineqarnissaa piviusumillu nassuerutigineqarnissaa pisariaqarpoq, isiginnaartitsisartoq erinarsortartorlu Karina Møller, isiginnaagassiami ”Avissaarneq”-mi peqataasoq, isumaqarpoq.
Karina Møllerimut isiginnaagassiap ”Avissaarnerup” Katuami sapaatip-akunnerata siulini nunarsuarmi takuteqqaarneqartup takuteqqaarneqarnissaata tungaanut sapaatip-akunneri pissanganartuusimapput.
Aviisi AG taama allappoq.
Tassami tamatuma tungaanut misiliisarnerni isiginnaartitsisartut ilitsersuisullu akornanni inuiaassuseq akimorlugu pikkunartumik oqallittoqartarsimavoq, isiginnaartitsisartoq tusagassiorfinnut takutitsisoqarmat AG-mit naapinneqarluni oqarpoq:
- Ilimagaara avissaarnissaq tassaasoq kalaallit amerlanerpaartaasa takorluugarisaat kissaatigisaalluunniit. Peqataalluni pissanganarluinnarpoq aamma oqallinnitsinni tamani (isiginnaagassiami, aaqq.), tassami isiginnaartitsisartut Kalaallit Nunaannit, Savalimmiunit Danmarkimillu pisuupput.
Karina Møller naliliivoq, Atlantikoq akimorlugu illuatungeriit akornanni isummat paaseqatigiissutigineqaleriartulersimasut, ilaatigut pisimasut kingulliit tusagassiuutini eqqartorneqartut tunngavigalugit, ilaatigullu minnerunngitsumik DR-ip ataatsimut oqaluttuarisaanitsinnik sukumiisumik sammisaqarsimanera tunngavigalugu.
- Danmarks Radiomi arlaatigut Danmark sinnerlugu oqaaseqartartuuvoq, tassanilu oqaatigineqarluni, Danmarkip nunasiaatilittut pitsaasutut imminut takorloortakkani immaqa allanngortinniartariaqaraluaraa. Tamannalu nassuerutiginninneruvoq, tamannalu saammaateqatigiinnissaq eqqarsaatigalugu siullertut alloriarnerulluni, Karina Møller erseqqissaavoq.
Aviisimi AG-mi atuarnerusinnaavutit. Aviisi uani pissarsiariuk: