Katuaq ukiuni 25-liinermini nalliuttorsiulersoq
Ukiut 25-t matuma siorna Katuaq sananeqarluni naammassivoq, taamanilu kikkunnit tamanit atorneqarsinnaalerpoq. Nalliuttorsiornerit assigiinngitsut, saqqummersitsinerit, tusarnaartitsinerit akumasunik tikeraartoqarnerillu illorsuarmi ukiut ingerlanerini pisarsimapput.
Ukioq manna Katuaq ukiuni 25-liilluni nalliuttorsiulerpoq. Kultorikkut illorsuaq assigiinngitsorpassuarnik misigisaqarfiusarpoq ukiullu ingerlanerani ineriartupiloorsimalluni.
- Katuap pilersinneqarnissaanut suleqataasut piviusunngormallu ineriartortitseqataasimasut tamaasa Katuaminngaanniit eqqarsaatigalugillu qutsavigerusuppavut. Katuami sulisimasut Katuamillu suleqateqarsimasut tamassi qujanaq, Katuap kulturimik suliaqarnerani tapiisarsimasut tamassi aamma qujanaq, siulersuisut siulittaasuat Anna Heilmann oqarpoq.
Ukiut 25-ni illorsuup ingerlanneqarsimanera kisiat nalliuttorsiutigineqassanngitsoq, aammali kulturikkut inuunerup ineriartorsimanera ineriartortuarneralu tulluusimaarutigisinnaajumaarparipput, siulittaasoq naqissusiivoq.
Katuaq 1997-imi februaarip 15-ani ammappoq. Ammarneqarnerminiit inuiaqatigiinnut annertuumik tunniussaqarpoq. Kateriffiusarpoq, kikkut tamarmik naapisimaarfigisinnaavaat nuannisaarfigalugulu. Ukiut ingerlanerini festivalit, saqqummersitsinerit, filmik isiginnaariarnerit eqqumiitsulianillu saqqummersitsiffiusarsimavoq.
Annerusumik minnerusumillu nalliuttorsiorneq
Nalliuttorsiorneq kikkunnit tamanit malugineqarnissaa Katuap qulakkeerusuppaa. Taamaammat ukiup ingerlanerani aaqqissuusinerit assigiinngitsut ingerlanneqartarumaarput. Taamaakkaluartorli februaarip 15-ani nalliuttorsiorneq annertunerusumik malunnartinneqassaaq.
- Ullorli atoqqaarfissiorneqarfipput, februaarip 15-iat, nalliussineqassaaq malunnartinneqarlunilu. KNR suleqatigalugu Katuamiit toqqaannartumik TV-kkut unnukkut aallakaatitsisoqassaaq. Katuap ukiuni 25-ni siullerni atuunnera kingumut qivialaassavarput. Qilanaarnaqaaq, pisortaq Arnakkuluk Jo Kleist oqarpoq.
Aaqqissuusinerit assigiinngitsut maanna pilersaarusiorneqaleruttorput, soorlu Nunatta Isiginnaartitsisarfia suleqatigalugu aaqqissuussaqarnerit nalunaarutigineqarput, aamma immikkut ittumik suliniutit ukiup ingerlanerani pisussat nalunaarutaasarumaarput. Nalliuttorsiornermut atatillugu suliniutit Katuap nittartagaatigut inuillu internettikkut attaveqaataasigut takuneqarsinnaasassapput. Katuaq taama paasissutissiivoq.