Kiisami Narsami juullerpoq
Ippassaq pingasunngornermi kingusinaalaartumik orpiliaq ikinneqarmat Narsami juullimi eqqissineqalerpoq
Ullunik pingasunik kinguaattoorluni kiisami pingasunngormat unnukkut Narsami juullip orpia ikinneqarpoq.
Sapaatit akunnerani kingullermi tallimanngornermi arfininngornermilu sakkortuumik niggernera peqqutigalugu adventit sapaataa siulleq sioqqullugu kommunip allaffiata saani orpik naparsinnaarpiarsimanngilaq.
Juullip orpia ukiut siuliini pisartutuut illoqarfittut ikinngutigisamit Gladsaxemit tunissutaavoq.
Pingasunngormat kiisami irpik ikinneqarmat Kommune Kujallermi borgmesterip tullia siulleq Kiista P. Isaksen naatsumik oqalugiarpoq, kingumut ukioq manna Gladsaxep illoqarfiup orpianik tunissuteqarsimaneranut qujassuteqarluni Gladsaxemilu innuttaasut kissalaartumik inuulluaqqullugit.
Meeqqat mamajunnapput
Taava Narsarmiut eqqissinartumik juullisiorluarnissaannik kissaappai.
Unnukkut qatsungalluni isseqarluni silageqisumi inuppassuit takkussuussimapput. Inuillu marlussoriarlutik orpiliareersullu kommunit traktoria kalitaqartoq tikiuppoq qatserisartut biiliinik marlunnik ikittaartulinnik ingiorteqarluni, kommunimilu juulimaat pingasut ikiortaallu meeqqanut allagartarmik pissarsisimasunut mamakujunnik tunioraallutik.
Piarnertut katersortarfimmi kaffisoqatigiinneq taamaatinneqarpoq inuimmi angerlarlutik unnukkorsiortussaapput.