Katuap paarlersua inunnik filmip
aallartinnissaa pissangallutik utaqqisunik ulikkaarpoq.
Piviusulersaarummi "Life on the
edge“-mi, Sebastian Feehanimit aamma Johnny Langenheimimit ilitsersorneqartumi,
imminut toquttarnerup pinaveersaartinnissaa eqqarsartaatsikkullu peqqissuuneq
pillugit filmiliarineqartumi Aqissiaq Nuka Semsenip sinerissami pinngortitami
alutornartumi inuit eqqarsartaatsikkut peqqissutsimikkut ajornartorsiutillit
ikiorniarlugit sulinera malinnaaffigineqarpoq.
Katuap paarlersua inunnik filmip
aallartinnissaa pissangallutik utaqqisunik ulikkaarpoq.
Piviusulersaarummi "Life on the
edge“-mi, Sebastian Feehanimit aamma Johnny Langenheimimit ilitsersorneqartumi,
imminut toquttarnerup pinaveersaartinnissaa eqqarsartaatsikkullu peqqissuuneq
pillugit filmiliarineqartumi Aqissiaq Nuka Semsenip sinerissami pinngortitami
alutornartumi inuit eqqarsartaatsikkut peqqissutsimikkut ajornartorsiutillit
ikiorniarlugit sulinera malinnaaffigineqarpoq.
Inuttaq pingaarnerpaaq,
ikinngutiginerpaasami toquneranik namminerlu artorsaatiminik nammataqartoq,
inuunerminik allannguisimavoq maannalu sinerissami ullut tamaasa imminut
toquttarnerup pinaveersaartinnissaa sulissutigilersimallugu.
Aqissiaq Nuka Semsenip, ilulissanik
avatangiiseqarluni inuusuttuaraq eqqissiveqanngitsuusoq, piniartoq kigaatsumik
pissusilik anaanaasorlu kisimiittoq sullippai. Tamarmik immikkut
ajornartorsiuteqarput naleqqussarfigisariaqakkaminnik, kinguaariillu akornanni
misigissutsikkut naalliuutit qaangernissaannik kissaateqarlutik.
Aqissiaq Nuka Semsenip assai
isugutapput. Pissangavallaarnini annilaanganinilu pissutigalugit ulloq naallugu
nerisimannginnami sajuppoq. Ernini aqqanilinnik ukiulik issiaqatigaa. Norsaq
filmimi suleqataasut allat peqatigalugit Katuap filmertarfiani saarlerni
issiavoq, uagullu filmeriat allat peqatigaluta filmi isiginnaarnissaanut
piareerluni.
Imminut toquttarneq pillugu
filmiliaasoq paasigakku timera oqimaallisutullusooq pivoq, ajoraluartumimmi
nunarsuarmimi imminut toquttartut amerlanerpaat nunatsinni pisarput. Filmili
pisariaqartumik sammisaq pillugu neriuuteqalernermik tunisivoq.
Anniaatini aallaavigalugu
pinngorartitsisoq
Inuttaq pingaarnerpaaq Aqissiaq Nuka
Semsen neriuummik tunisivoq. Meeraanerminit misigissutsimigut naalliuutigisani
aamma ikinngutimi ilaquttamilu qaniginerpaasaminik annaasaqarnikuuneq nammineq
aamma nammatarai. Kamaqarninili tunissutitut isigalugu anniaatini
aallaavigalugit nutaanik pinngorartitsisinnaanerata filmi qaffatserujussuarpaa.
Assini killitsinnartuni
maluginiakkama aappaat tassaavoq kalaallit kulturiata filmimi qanoq
ersersinneqartiginera. Kalaaliussuserput kusanartumik takutinneqarpoq.
Pinngortitap kulturillu uagutsinnik nukissaqalersitsisarnerat
ersersinneqarluni.
Aamma Qaanaami piniartoq
maluginiarpara. Piniartoq aallaqqaammut sunnertissinnaarpasinngilaq, filmilli
ingerlanerani ammaneruleriartuinnarpoq misigissutsinilu pillugit
eqqartuilaartalerluni. Tamannalu oqiliallaatigaa taamaalillunilu filmip
pingaarnersaata ilaannik takutitsilluni: nipangersimaannannginnissaq.
Aqissiaq Nuka Semsen filmip
takutinneqarnerani qullilivoq. Qanigisaa aamma alla qaammat kingulleq imminut
toquppoq. Filmip takutinneqarnerani misiginikuusaminut utersaarpoq,
soorlulusooq anniaatini aqqusaaqqillugu. Ikinngutiginerpaasani ilaquttanilu
qanigisani imminut toqunnerannut annaanerani anniaatigisani. Sooq tarnikkut
peqqissutsimut tunngasunik suliniuteqartalersimanini ullumikkullu qanoq
angusaqarsimatiginini eqqarsaatigalugu. Tulluusimaarpoq.
Filmi naammat isiginnaartut
nikuillutik ersaattaapput. Inersuarmi qiimmattartoqarpoq. Aqissiaq Nuka Semsen
nikuilluni assani uummatiminut ilillugit minutsini arlalinni ersaattaattut
qujaffigimmagit killitsippunga.
- Qanoq misiginera
oqaasinngoruminaappoq. Tupigutsappunga eqqarsaatigalugulu sooq
sulilersimanerlunga. Inoqatinnut asanninnera pissutigalugu maanga killippunga,
filmi takutereerlugu Aqissiaq Nuka Semsen AG-mut oqarpoq.
Neriuuteqalersimasutut misigalunga,
oqiliallattutut ingammik maanna taarsiarsaartalernerani filmertarfik qimallugu
anivunga. Misigalunga anniaatit oqaloqatigiissutiginissai ajunngilluinnartuusoq
pissusissamisoortorlu.