Kina kalaaliua: Naleraq oqallissaareqqilerpoq
Apeqqut akiuminaattoq, inuiaqatigiinnili misigissutsinik sakkortuunik pilersitsisinnaasoq, Inatsisartut upernaakkut ataatsimiinnerminni oqaluuserissavaat. Oqallinneq pisariaqartoq, oqallinnissamik siunnersuuteqartut, Naleraq, isumaqarput.
Naleraq pingajussaaneerluni kikkut kalaaliunerannut tunngasumik oqallinnissamik siunnersuuteqarpoq. Pingajussaaneernerlu iluatsissinnaasutut isikkoqarpoq.
Partiip oqallinnissamik siunnersuut siullermeerlutik ilannguppaat oktoberimi 2020-mi. Oqallinnissamulli siunnersuutit ukiukkut ataatsimiinnissamut 2021-mut kinguartinneqarmata kalaaliunermut tunngasoq aamma kinguartinneqarpoq. Oqallinnissarli tikinneqanngitsorli Inatsisartunut aprilimi 2021-mi qinersisoqartussanngorpat, oqallinnissamut siunnersuut Inatsisartunit oqaluuserineqanngitsoorpoq.
Isummernissaq pingaaruteqartoq
Kalaallit kinaassusaat, kinalu kalaaliunersoq pillugu isummernissaq pingaaruteqartoq, Naleraq isumaqarpoq.
Inatsisartunilu ilaasortat kalaallit kinaassusaat pillugu oqallittussanngorput.
Naleraq oqallinnissamut siunnersuuteqartuupput.
- Apeqquteqaammut oqittumik akissutaasinnaasumik nassaassaqarunanngilaq, qulequtsiunneqartup misigissuserpassuavut imaannaanngitsut qaffakaatissinnaagunarpai. Oqallisissiamik taamaattumik saqqummiussaqarnikkut avissaartuuttitsinissaq siunertarinngilara, kisiannili kissaatigaara, eqqarsaasersuutaasinnaasut piviusorsiortut oqallisigalugit aallarteriissasugut, piffissammi arlaani kalaallit uagut ataatsimoortumik inatsisitigut tunngavissarput isummerfigisussaavarput namminiilivinnissarpullu taasissutigalugu, oqallinnissamut saqqummiussami allassimavoq.
Siuaat sumi inunngorneri apeqqutaapput
Kalaallit kinaassusaat kikkullu kalaaliunersut inuiaqatigiinni akuttunngitsumik oqallisigineqartarpoq. Inatsisartunilu siunnersuutigineqartuni assigiinngitsuni kikkut kalaaliunersut aamma oqallittoqarsinnaasarluni.
Naleqqamiit kikkut kalaaliunersut isummersortoqarnissaa kissaatigineqarpoq. Siuaallu kikkuuneri tassani soqutiginaateqarsinnaasoq, Naleraq isumaqarpoq. Assersuutigineqarpoq ilaatigut aanaakkut aataakkulluunniit akornanni ikinnerpaamik ataaseq Kalaallit Nunaanni inunngorsimappat, taava kalaaliuneq tunngavilersuuteqarluarsinnaasoq.
- Angajoqqaavit arlaat nunatsinni inunngorsimappat aammalu taakkua angajoqqaavini ataaseq nunatsinni inunngorsimappat taava ilimagissavat illit aamma kalaaliugavit, siunnersuummi allassimavoq.
Oqallinnissamut siunnersuut Inatsisartuni 17. maj oqaluuserineqassaaq.
Inatsisitigut kikkut kalaaliunersut Inatsisartuni aamma oqaluuserineqarnikuuvoq, tassani Demokraatit siunnersuuteqartuullutik.