KNR-imi inuusuttunut aallakaatitassiaq nutaaq
Aallakaatitami 'Oqarit' inuusuttut tv-kut radiokkulu sammineqassapput, aaqqissuisoq oqarpoq, ukiorpassuarni DR-imi radiukkut aallakaatitassiortarsimasumit Tine Bryldimiit isumassarsisimasoq.
Sisamanngorpat januaarip 21-ani nalunaaqutaq 22.00 KNR-imi inuusuttunut aallakaatitassiaq 'Oqarit' aallartissaaq. Aallakaatitaq tv-kut 30 minutsinik aallakaatitsinermik imaqarpoq, minutsit 40-t radiokkut oqallinnermik toqqaannartumik malitseqarluni.
'Oqarimmi' aaqqissuisoq, Pipaluk Kreutzmann Jørgensen, oqarpoq, siunertaasoq nunatsinniit tamarmit inuusuttut aallakaatitassiamut allattassasut qanorlu innertik oqaluttuaralugu. Taamaalillutik tassaassapput inuusuttut aallakaatitassiap imaanik aalajangiisuusut.
Pipaluk K. Jørgensenip erseqqissarpaa aallakaatitassiami aqutsisut pingasut tassaanngimmata immikkut ilisimasallit imaluunniit siunnersortit. Tv-kut aallakaatitassiami sammisanut isummatik anissinnaassavaat, inuusuttullu radiokkut oqaloqatigalugit.
– Nerisarnermut akornutinik arlallit allaaserisaqarpata, taava qulequtaq taanna sammissavarput, nerisassanik ilisimasalimmik tarnillu pissusaanik nakorsamik ilaqarluta, Pipaluk K. Jørgensen oqarpoq.
Aaqqissuisoq oqaluttuarpoq radiokkut aallakaatitassiortartumit Tine Bryldimit isumassarsitinneqartarluni, taannami ukiut 30-t sinnerlugit inuusuttut ikiorneqarlutillu tusarnaartagaanni 'Tværsimi' Danmarks Radiomi aaqqissuisuuvoq.
– Tine Bryld isumassarsiffigisaqaara, minnerunngitsumik kinaassuserminik isertuaneq ajormat ammasumillu isummani anittarlugit, Pipaluk K. Jørgensen oqarpoq.
Aallakaatitassiaq 'Oqarit' aqqutigalugu KNR-ip inuusuttunut suliniutini 'Sofa Aappalaartup' kiisalu 'Inuusuttut Silarsuaanik' imaqartut nangippai.
Mannangaaq aallakaatitamut allattoqarsinnaavoq oqarit@knr.gl aqqutigalugu.