KNR TV-p inuusuttunut aallakaatitassiaa nutaaq
KNR-ip inuusuttunut aallakaatitassiaa nutaaq Inuusuttut Silarsuaat aallakaatinneqartalerpat asanninneq, nipilersorneq, ikiaroornartut ilinniartitaanerlu sammineqartassapput.
Aviaq Tobiassen, Arnâránnguaq Inûsugtoq, Erneeraq Fleischer Pilunnguaq Kleistilu inuusuttunik aliikkusersuisuussapput nutaat.
– Kalaallit imaannaanngitsorpassuit oqaluttuariniarpavut, inuusuttut allat inuunerup tamakkiisumik atornissaanut isumassarsisinniarlugit. Tamanna ilumoorutivillugu ingerlanneqassaaq, soorunami aamma aliikkusersuinertut ilusilerlugu, inuusuttunut aallakaatitassiami aaqqissuisoq Aka Maria Koch Hansen oqarpoq. Taassuma pingaartippaa Kalaallit Nunaanni inuusuttut sapinngisamik amerlasuut tusaaneqarnissaannut takuneqarnissaannullu periarfissinneqarnissaat.
Inuusuttut Silarsuaat sisamanngornerit allortarlugit aallakaatinneqartassaaq aallakaatitassiamilu siullermi sisamanngornermi 22. januar nal. 19.55 aallakaatinneqartussami, inuusuttunut aaqqissuisoqarfiup Kalaallit Nunaanni inuusuttuuneq ullumikkut qanorpiaq oqaatigisariaqarnersoq aallarniutigissavaa.