Knud Rasmussen pillugu katersugaasivik

Knud Rasmussen Hundestedimi eqqaaniuteqareerpoq. Aamma maannakkut Sjællandip avannaani Kalaallit Nunaannut angalatoorsuaq sapiitsuliortorlu katersugaasiviliortoqarniarlerpoq.

Aningaasaateqarfissuit arlaqartut sulimiummik soqutiginnilereersimapput, ukiortaamiillu katersugaasivilerisut, sulinuteqartut, Knud Rasmussenimit kingornussisut Knud Rasmussen-Selskabetimillu ilaasortat piareersaasiornerit ingerlatilissavaat, kingornalu aningaasassarsiornissaq aallartissallugu.

Taama allappoq Frederiksborg Amts Avis.

Helle Lunderød ( S) kultureqarnermut, sunngiffimmut tamallu qanimut oqartussaaqataaneraannut ataatsimiititaliami siulittaasoq suliniaqatigiinni siuttuuvoq.

- Kalaallit Nunaat assorsuaq soqutigineqarpoq, tamannalu Knud Rasmussenip illuanut takkuniaasut amerlassusaannit takusinnaavarput, oqarpoq silaannaallu allanngoriartornera tassani peqqutaaqataanerarlugu.