Knud Rasmussen pillugu musical
Nipilersortartup Lasse Heinerip nunatsinni ilisimasassarsiortartoq Knud Rasmussen pillugu nipilersuuserlugu isiginnaagassiani ukioru naammassissamaarpaa.
Ukiut marlussuit matuma siornatigut Lasse Heinerip Knud Rasmussenip taalliaa, Mit Land, erinniorpaa erinarsuullu taanna Lasse & Mathilde-mit atorneqarpoq Nunatsinni Inuiattut Ullorsiornermi, Knud Rasmussenip Katersugaasiviani.
- Sivisuumilli Knud Rasmussen marloriaammillu kinaassuseqarnera alutorisimaqaara - angutaa qallunaajusimavoq palasi, Kalaallit Nunaannukartoq ajoqersuiartorluni. Arnaa kuartimik eskimuujuvoq, Knud Rasmussenilu nammineq misigisimavoq marlunnik nunaqarluni. Taamaattumik Danmarkimiikkaangami Kalaallit Nunaannut angerlarsertarpoq, Kalaallit Nunaanniikkaangamilu Danmarkimut angerlarsertarluni. Avissimasutut misigisimaneq tamanna ilisimaneqarluarpoq, Lasse Heiner Fyens Amts Avisimut oqarpoq, taamaattumillu nipilersuuserlugu isiginnaagassiorpoq, Knud Rasmussen oqaatsitigut nipilersornikkullu takutinniarlugu.
Lasse og Mathilde Nunatsinni tusarnaartitseqattaaqqammerput - ilaatigut Tasiilami.