Koda Awards: Ukiumut nersornaat FINNi-mut tunniunneqarpoq

1991-mili Kodap kalaallit erinniortut taalliortullu nersorniarlugit Koda Awardsimi nersornaasiisarneq ingerlattarsimavaa. Ippassaq Koda Awards Katuap inersuaani ingerlanneqarpoq, tassanilu ilaatigut siuliani nersornaaserneqarnikut peqataapput.

Ukioq manna ukiumut nersornaat taalliortumut tusaamaneqarluartumut FINNi-mut tunniunneqarpoq, isumalluarnartumullu nersornaat Ivaanamut tunniunneqarluni. Nersorneqartut naliliisartuniit toqqarneqarput.

Tusaamaneqarluartoq FINNi Andachan suleqatigalugu saqqummersitsivoq. Nipilersortariaatsit assigiinngitsut akimorlugit, taamaalilluni tusarnaartartut assigiinngitsut ataatsimut tusarnaattorisinnaallugit.

- Erinnat assigiinngitsunik imaqarnerisa nipilersoriaaseqarnerisalu tusarnaartut immikkut misigisaqartippaat. Taamaalillutik ataqatigiisilerlugit. Nipilersoqatigiit immikkuullarissutsiminnik tusarnaartitsinerminni qaartitsisutullusooq takutitsipput. Tassa saqqummersitap naligilluinnagaanik nipilerlutik tusarnaartitsigamik, FINNi-p nersornaaserneqarneranut tunngavilersuutit ilaatigut taama nipeqarput.

Isumalluarnartumut nersornaat arnamut inuusuttumut tunniunneqarpoq, taanna iTunes-ikkut nipilersukkanik tallimanik saqqummersitseqqammerpoq.

- Ivaana arnaavoq inuusuttoq nipilersornerup silarsuaanni immikkuullarissutsiminik nassaarluarsimasoq. Saqqummersitaata siulliup suliarilluarsimanerata takutippaa nammineerluni nipissaminik nassaarsimanera. Saqqummersitaata tusarnaartitsisarneratalu takutippaa inuttaata piginnaasaqassusaa. Saqqummersitaata ersersippaa inuttut nunamut tunnganera ineriartorsimaneralu, Ivaanap isumalluarnartumut nersornaaserneqarnerani tunngavilersuutigineqartut ilaatigut taakkuupput.

Nersornaaserneqarsimasut nersornaatitik tiguaat

Kodamut nersornaaserneqartut nalinginnarmik allagartamik naasunillu tunineqartarsimapput. Ukiorli kingulleq Kodap Kalaallit Nunaanni ingerlanneqarnerani ukiuni 30-inngortorsiornermi neriorsuutigineqarpoq nersornaatit nersornaaserneqarsimasunut tunniunneqassasut. Taamaasilluni nersornaasiinerup saniatigut siuliani nersornaaserneqarsimasut Kodamiit nersornaatitik angerlaappaat.

Koda Awards toqqaannartumik KNR-ikkut nalunaaqutaq 19.45-imiit aallakaatinneqarpoq.

Ukiumut nersornaaserneqarnissamut toqqarneqarsimasut:

• FINNi for udgivelsen ’Qanormita ippa?’
• Uummatip Nipaa med Tønnes Kreutzmann for udgivelser, som er nyskabende i forhold til korsang i Grønland
• Toornat for udgivelsen ’ Inuiaat ’

Isumalluarnartumut nersornaaserneqarnissamut toqqarneqarsimasut:

• Ivaana for udgivelsen ’Jamaica’
• Malik Lennert for hans aktive udgivelser, som er de fire udgivelser, han har lavet mellem 2020 og 2021
• Athena Lings for ‘Depression In The Roads’