Koldingimi Kalaallit Nunaat
Koldingimi Nikolaj Bio-p filmini marlunni Kalaallit Nunaat takutissavaa.
"Grøn Hverdag i Sydjylland"-ip arfininngorpat februaarip 28-iani nal. 13.00 Kalaallit Nunaat immikkut sammissavaa.
tusagassiortup, assiliisartup ilitsersuisartullu Isak Kleistip filmiliani piviusulersaarut nutaaq "Ved de frosne floder" takutillugulu oqallisigitissavaa, Qeqertarsuup tunuani inuunermik, pinngortitamik silaannaanillu oqaluttuartoq.
Tamanna pereerpat ilisimasassarsiortartut ittuat Søren Andersen Kalaallit Nunaata kangiani angalasarnermit oqalugiassaaq. Oqalugiarneq ilisimasassarsiornernit 10-init piffissami 1989-2008 pisimasunit tunngaveqarpoq.
Aamma filmi Shaman takutinneqassaaq, taassuma oqaluttuaraa Uumaaq, inuk inuusuttoq piniartoq pinngortitami najoriminaatsumi aniguiniarluni angakkunngortoq. Filmi akvarelle-t ataasiakkaat arlalissuit qaleriiaarlugit filmiliaasunik imaqarpoq, taakkua sunniutaa takussassaq sakkortooq tiguartinnartorlu, Rasmus Lynerthip nipaanik erinarsorneranillu nipitalersugaq.