Kommuni angajoqqaanut: Ulluunerani neqeroorutaasinnaasunik pitsaanerusunik siunnersuuteqaritsi
Kommuneqarfik Sermersuumi meeqqeriviit sulisussaaleqiffiusupilussuupput. Kommunimit maanna innuttaasut pitsanngorsaataasinnaasunik siunnersuutillit tusarusunneqalerput.
Kommuneqarfik Sermersuumi meeqqeriviit sulisussaaleqinerat sapaatip-akunnerini kingullerni oqallisigeqqinneqalerpoq.
Meeqqanut Atuarfeqarnermullu Ingerlatsivimmit Nuup Qinnguani meeqqerivimmi sulisussaaleqisoqarnera pissutigalugu meeraaqqerivimmi inissaqalernissamut allatsittarneq qaammatini marluni matugallarneqarsimavoq. Tamatumunnga peqatigitillugu illoqarfimmi innuttaasunut mikinernut ptsaanerusumik neqerooruteqartoqartalernissaa anguniarlugu atsiornernik katersisoqarpoq,
Kommuneqarfik Sermersuumit innuttaasut maanna neqeroorfigineqarput, kommunip meeqqerviini sisamaasuni pitsanngorsaataasinnaasunik siunnersuuteqaqqullugit.
- Kommunimiit meeqqat ulluinnarni toqqissisimanissaat, aammalu sammisassanik, meeqqat toqqissisimanerinut ineriartornerinullu tapertaasunik qulakkeeriffigineqarnissaat kissaatigineqarpoq. Tamatuma peqatigisaanik aamma sulisut suminerminni avatangiisaasa pitsaanerulernissaat annertuumik aallunneqarpoq, kommunimi suliniut pillugu kommunip innuttaasunut nittartagaatigut kommunimit allapput.
Suliniutit arlallit aallartinneqarsimasut
Pingaartumik immikkoortut pingaarnerit sisamat, ulluunerani paaqqinnittarfeqarnermut siuarsaaqataasinnaasut aallunneqarput.
Immikkoortut sisamat pineqartut tassaapput:
- Sulisussarsiorneq sulisunillu pigisaqaannarniartarneq
- Angajoqqaanik suleqateqarneq ikaarsaariarfiillu pitsaasut
- Meeqqat toqqissisimanissaasalu aallunneqarneri
- Paaqqinnittarfinni avatangiisitigut sinaakkutissat
Innuttaasut immikkoortunut pineqartunut pitsanngorsaataasinnaasunik siunnersuutissallit, nittartakkatigut saqqummiussinissaannik qinnuigineqarput:
- Sulisussanik nutaanik pissarsiorneq
- Angajoqqaanik suleqateqarneq nukittooq
- Meeqqat ulluunerani paaqqinnittarfinniittalernerminni sungiusartarnerat
- Assersuutigalugu angerlarsimaffimmiit meeraaqqerivimmut aamma meeraaqqerivimmiit meeqqerivimmut ikaarsaartarnerit
- Siunnersuutisi perorsaanermut sulisullu suliatigut piginnaasaannut, imaluunniit paaqqinnittarfimmi avatangiisinut sinaakkusiussanut tunngassanngillat. Siunnersuutisi aalajangersimasunut tunngasuussappat, ajornanngippallu kommunimi ulluunerani paaqqinnittarfinni tamani aallartinneqarsinnaassapput. Inunnut saassussinissaq inerteqqutaavoq, aammalu ileqqorissaarnissaq inassutigineqarpoq, kommunimit kaammattuuteqarput.
Siunnersuutit kommunimut tamarmut atuutissapput.
Kommunimit innuttaasut septembarip arfernaniit septembarip 26-anut siunnersuuteqarsinnaanerat ammaanneqarpoq. Suliniutit pillugit atortussat UANI nassaarisinnaavatit.