Kujataata assiliisua toquvoq

Assiliisoq John Rasmussen, Narsami Mestervejimi najugalik, maajip 29-ani 2024-mi 78-inik ukioqarluni toquvoq.

John Rasmussen Valbymi inunngorpoq, sanasutulli Kalaallit Nunaannukarpoq, Qaqortumilu 1968-imi 1969-imilu ukiup ilaani sulisarluni. 1970-imi aasakkut Narsami napparsimmaviliornermi sulileqataalerami illoqarfimmut tassunga nuuppoq. John Rasmussen ilaqutariittut assiliisartutullu inuuniuteqarnera Narsami tunngaveqalerpoq.

1971-imi assiliisarnini pimoorullugu aallartippoq. Aallartilluarpoq 1976-imiillu assiliineq inuussutigilersimallugu. Assiliissuttagai pingaarnertut tusagassiuutaapput. Pingaartumik kalaallit aviisii qallunaallu atuagassiaataat sapaatip akunneranut saqqummersartut. Aamma qallunaat assiliisarfissui assinik nunarsuarmut tamarmut tuniniaasut pisisartorisimavai. Kalaallit Nunaannit assinik piumasoqartuaannarpoq - aammalu pisuni annerni soorlu kunngikkormiunit tikeraartoqartillugu, aamma USA-p nunanut allanut ministeriata Colin Powellip, qallunaat nunanut allanut ministeriata Per Stig Møllerip taamanilu nunanut allanut naalakkersuisuusup Josef Motzfeldtip oqaluttuarisaanermi Igalikumi 2004-mi isumaqatigiissut atsioqatigiissutigineranni.

John Rasmussenip tusagassiuutinut assiliisarnerup saniatigut ukiorpassuarni aamma Narsami assiliisutut sulisimavoq, illoqarfimmi pisoqarnerani ilaqutariit katersuuffigisartagaanni. Katittorsiorneq, nalliuttorsiorneq il.il. – ukiullu tamaasa Narsami atuarfimmi atuartut assilisarsimavai.

Pitsaassusaa ajunngittuaannarpoq

John Rasmussenip Kujataani inuuneq inuiaqatigiinnut akulerusimanerminut tapersersuilluarnermik ersersitsivigaa. Pissutsit pitsaasut isiginiartarpai – teknikkikkullu pitsaanerpaamik atuiuaannarluni. John Rasmussenimik assiliisoqarnissamik inniminniigaanni assit erseqqissuunissaat inissilluakkamillu isikkoqarnissaat qulakkeerneqartarpoq.

John Rasmussenip 2021-mi ukiunik 50-inngortorsiorluni nalliuttorsiornerminut atatillugu ukiorpassuani assilisimasani tigulaariffigalugit saqqummersitsivoq, taannalu Narsami apriilimi 2021-mi ammarneqarpoq, tamatumalu kingorna Nanortalimmi, Paamiuni, Maniitsumi Nuummilu Nunatta Atuagaateqarfiani oktobarimi 2022-mi saqqummersinneqarluni. Assit taakku maanna Narsami katersugaasivimmut tunissutigineqarnikuupput.

John Rasmussen ukioq manna Kommune Kujallermit assilialiornermigut nersornaaserneqarpoq.

- John Rasmussen assiliisut pitsaanerpaat ilagaat. Ukiut ingerlanerini Sermitsiami assiliisartuunikuuvoq. Isumaqatigiittuaannanngilagut oqaloqatigiuminartuujuaannarporli. Sermitsiarlu pisariaqartitsigaangat tunniussisuaannarpoq. Toqqorsivini nalunngilluarpaa, assillu sorliit atornerivut ilisimallugillu, Sermitsiami aaqqissuisuusimasoq Poul Krarup oqarpoq.

John Rasmussenip nuliani Bolette Frederiksen 2023-mi toqukkut qimagunnerani annaagamiuk aliasuutigingaarpaa. Aammattaaq katsorsarneqarsinnaanngitsumik kræftimik eqqugaavoq taavalu isinik tappiilliartortitsisumik eqqorneqarluni. Kingulleq assiliisarneranut ajornakusoortitsilerpoq.

Nalunngilaa qanoq pisoqassanersoq. John Rasmussen maajip 14-ianni sivisuumik oqaloqatigaara, oqaatigaalu naggammik assiliisimalluni. Isai pisinnaajunnaarput. Killitsinnaqaaq. Kalaallit tusagassiuutaannut iluaqut unippoq.

John Rasmussenip toquneratigut assiliisartoq asseqanngitsoq inuunermini sivisuumi Kujataata nuannersortaanik nuanniitsortaanillu assiliisartoq annaavarput. Inuk asseqanngitsoq.

John Rasmussen Narsami juunip aappaani ilisaavoq. Qitornani, ernuttani ernutaqqiutinilu qimatarai.