Kulturi malunniuteqarnerulerli
- Sinnattoraarput ullut ilaanni kulturimut tunngasunik eqqarsartaatitsinnut misigissutitsinnullu naapertuuttunik qinigassaqarsinnaassalluta, kulturitsinnik malunniuteqaqqusineruniarlutik tallimanngorpat akerliussutsimik takutitsiniartut nalunaarput.
- Annerusumik malunniuteqaqqusisut Katuap eqqaanit tallimanngorpat septembarip 28-viani nal. 15.00 aallartissapput inatsisartut ataatsimiittarfiata eqqaanut ingerlaqatigiittoqassallutik.
Akerliussutsimik takutitsinissamut aaqqissuisuupput Stina Berthelsen, Mikisoq H. Lynge, Lena Olsen aamma Inuk Silis Høegh, taakku annerusumik minnerusumilluunniit kulturilerinermik suliaqartuuppput. Kulturi annerusumik malunniuteqaqquniarlugu ima nalunaaruteqarput.
- ”Inuussutissarsiutigut pillugit sukataartorujussuusoqarpoq, timigissartarluta aatsitassat piaarnissaannut erngulluta, sumiginnaalluta imminortut naliginnaralutigit.
Ajornartorsiutit tassaapput tarnikkut nappaatit takussutissartaat – nappaat qangalilli attattualerneqarsimaoq. Tarniluutit katsorsarneqarsimanngisaannartut kinguariaat inuunerluttut, tassapput nappaatini ajornerpaanut ilaasut.
Inuianni kalaallini inuit amerlanersaat unittooqqapput. Ilagutiinnarneq, soqutigisaqannginneq inuiaqatigiinnullu takornartaasorilikkamut akisusaassusermik misigisaqannginneq.
Isumaqarpugut kinaluunniit periarfissaminik suli atuilluanngitsoq. Isumaqarpugut inuianni kalaallini periarfissanik nunguttuitsunik ulikkaartoqartoq. Inunni ataasiakkaani suli sinittoqartoq.
Ajornartorsiutit amerlangaarmata nukissaqartitsisoqarani imaluunniit nukissanik amigaateqartoqangaarmat siniliinnarsimasunik.
Qaa inuuneq suli pigiuminartoq eqeersartigu eqqumiitsuliornikkut kulturikkullu akisussaaqataanikkut!!”