– Kulturikkut eriagisassagut asiutikkiartortippavut

Børsenimi apriilip 16-anni 2024-mi ikuallannerup kingunerisaanik eqqarsaatersuutit annertuut pilersimapput, pingaartumik Inatsisartuni ilaasortamut, Doris J. Jensenimut (S). Taassuma Inatsisartuni sulinermini ilungersuutigisaanut ilaavoq pingaarnersiuinermi Kalaallit Nunaata Nunatta Katersugaasivianik qaffassaanissaq.

- Nammineq kulturigisaq ilisimassallugu pingaaruteqarpoq, tassami kikkunnut atanermut paasinnittariaatsimut pingaaruteqarluni inissisimavoq. Inuiattut oqaluttuarisaanerput eqqarsaatigissagutsigu katersugaasiveqarnerput pingaaruteqarluinnarluni inissisimavoq. Assinganik pingaaruteqartigaaq katersugaasiviit kulturikkut eriagisatsinnik katersaqarlutik ingerlatsisut politikikkut tapersersorneqarnissaat, taanna erseqqissaavoq nangillunilu:

- Kulturikkut eriagisassagut naammattumik isumannaarsimanagit. Ilarparujussui Nunatta Katersugaasiviata qaliani isugutatsinneqarlutik piuneerutsikkiartorneqarput, ilarparujussuilu nunani allani inissisimatinneqartut.

Suliassaqarfimmi pilersaarut sumiippa?

Doris J. Jensenip Inatsisartut upernaakkut ataatsimiinneranni 2022-mi siunnersuutigaa, kulturikkut kingornussat toqqorsivissaannik sanaartornermik pilersaarusiortoqassasoq, taamaalilluni kulturikkut kingornussassatut toqqorsivissaq nutaaliaasumik pilersinneqassasoq, aammalu siunertamut aningaasaliissutissat qulakkeerneqassasut.

Siunnersuut Inatsisartuni tapersersorneqarpoq, Naalakkersuisullu piumaffigineqarput nutaamik toqqorsiviliornissamik Nunatta Katersugaasiviani pilersaarutit salliutinneqarnissaat.

Taamaattorli Naalakkersuisut siunnersuummut allannguutissatut siunnersuuteqarput, Nunatta Katersugaasiviani toqqorsiviit nutaat pilersinneqarnissaat neriorsuutigalugu aammalu suliassatut pingaarnertut ilaattut inissinneqarnissaat pillugit Naalakkersuisut peqquneqarnissaat Inatsisartut aalajangiiffigisassaattut siunnersuu

Kisianni nutaamik toqqorsiviit suliassaqarfimmullu pilersaarutip aningaasaqarnikkut kingunerisai aningaasanut inatsisissatut siunnersuummi imaluunniit allani takuneqarsinnaanngillat.

Taamaammallu Nunatta Katersugaasivia Allagaateqarfialu pingaartinneqarnerulernissaanut Doris J. Jensen maanna sakkortuumik piumasaqarpoq.

- Isumaqarpunga Børsenimi ikuallattoorneq nunatsinni aamma malugineqartoq tamatsinnut oqariartoraluartoq, eriagisassat qanoq pingaaruteqartigineranik aammalu uaguttaaq kulturikkut eriagisagut pimoorunnerullugit ingerlatsilluta pisussaaffeqartugut, taanna tikkuaavoq.