Kunngikkormiuni inuuissiortoq nalliuttorsioqataaffigerusuppiuk?
Namminersorlutik Oqartussat qinnuteqartitsillutik aallartipput H.K.H. Prins Christian 15. oktober 18-nik ukioqalerpat peqataarusuttunut. 18-nik ukioqaruit Christiansborgip illussaarsuani nalliuttorsioqataasinnaavutit.
Maanna nassaariniarneqalerput kalaallit marluk prinsip inuuissiornerani peqataasussat. Taamaammat Kunngikkormiut Namminersorlutik Oqartussat suleqatigalugit, inuusuttut marluk 18-nik ukiullit iluanaarlutik nalliuttorsiornermi peqataasussat nassaariniarneqassammata.
- Taamaammat maanna Namminersorlutik Oqartussat angummik arnamillu 18-nik ukiulinnik, Kunngikkormiutut Ataqqinassusillip, Prins Christiap, inuuissiorneranut peqataasinnaasunik pissarsiorput. Dronningi nerersuaarnermut qitinnertalimmut ulloq taanna nalunaaqutaq 17.00 qaaqqusivoq.
H.K.H Prins Christian-ip inuuissiornerani nalliuttorsioqataarusukkuit, uku piumasaqaataapput:
- Siullermik 18-ileereersimassaatut ulloq 15. oktober 2023 nallertinnagu.
- Aappassaanik mailimik allagaqassaatit, atit, najukkat, inuuiit, mobilivit normua aammalu naatsumik oqaluttuarlutit sooq nalliuttorsioqataarusunnerlutit.
Peqataarusukkaanni qinnuteqaqqaartoqassaaq
Namminersorlutik Oqartussat aamma Air Greenland ilisimatitsipput ilinniartuutitik peqataasussanik taakkuninnga marlunnik toqqaassamaartut.
Qinnuteqarnissamut killiliunneqarpoq 18. september 2023 inuillu toqqagaasut marluk avammut suaarutigineqassapput 20. september 2023.
Air Greenland angalanermi billetsinik aningaasaliisussaaq aammalu Namminersorlutik Oqartussat unnuinertaanik isumaginnissallutik.
Inuusuttut 200-it missaannik amerlassusillit Danmark, Kalaallit Nunaat aammalu Savalimmiut sinnerlugit nalliuttorsiornermi peqataanissaminnut qaaqqusaapput.
Soqutiginnippit Christian pillugu nalliuttorsioqataanissannut? Qanoq ilillutit peqataasinnaanissannut tunngatillugu apeqqutissaqarpit? Taava Kuka Lyberth attavigisinnaavat, taanna ilitsersussallutit piareersimavoq.