Kunngikkormiut Savalimmiunut tikeraarnissaat taamaatiinnarneqarpoq suliumajunnaarnerup kingunerisaanik
Savalimmiormiut lagmandiat isumaqarpoq kunngikkormiut Savalimmiunut tikeraarnissaat suliumajunnaarnerup kingunerisaanik pissusissamisuussanngitsoq.
Kunngikkut meeqqallu assilineqarnerat Qaqortumi 2014-imi tikeraarnermeersuuvoq, tassani tikeraarnerminni Kalaallit Nunaanni Kunngissakkutut tikeraarput.
Asseq toqqorsivimmit: Leiff Josefsen
Annertuumik sivisuumillu suliumajunnaarneq Savalimmiuni nalaanneqarpoq, tamannalu danskit Kunngikkormiut pisortatigoortumik Savalimmiunut sapaatip akunnerani tullermi pisussaagaluartumut akornusiivoq.
Savalimmiormiut lagmandiat, Aksel V. Johannesen, aalajangerpoq Savalimmiunut tikeraarnissaat piffissaligaanngitsumik kinguartinneqassasoq, pissutaatinneqarluni "tikeraartoqarnissaa maannakkut pissutsini taamaattuni naammassineqarsinnaanngimmat".
Kunngikkut nunatsinnut tikeraarnissaannut tunngatillugu maluginiagassaq
Kunngikkut nunatsinnut tikeraarnissaat 29. junimiit 6. julip tungaanut pisussaq pilersaarutit malillugit ingerlanneqarumaartoq Naalakkersuisut siulittaasuata naalakkersuisoqarfianit Sermitsiaq ilisimatinneqarpoq.
Savalimmiuni Naalakkersuisut Ritzau-mut mailikkut allagaqarlutik taamak ilisimatitsipput.
Kunngi Frederiup aamma Dronning Maryp Savalimmiunut tikeraarnerat pisussaagaluarpoq juunip 12-aniit 14-ata tungaanut, Kunngikkut Nunani Avannarlerni angalaneranni annertuumi Savalimmiunut tikeraarnissaat pilersaarummut ilaagaluarpoq.
Kunngikkormiut illussaarsuanni attaveqaqatigiinnermut pisortaq, Lene Balleby, tusagassiutinut nalunaarummi allappoq kunngikkormiut aalajangernermut "tamakkiisumik paasinnilluartut".
- Ataqqinartorsuit kingusinnerusukkut pilersaarutit malillugit Savalimmiunut tikeraarnissartik qilanaarivaat, ilanngullugu nalunaarutigineqarpoq.
Savalimmiuni suliumajunnaarneq, maajip qeqqata missaani aallartinneqartoq, maanna kinguneqarpoq niuertarfinni pisiassaqarpiannginneranik, paaqqinnittarfiit matoqqanerannik benzinamillu amigaateqarnermik.
Eqqaavilerisut, lastbiilinik ingerlatitsisut, umiarsualivimmi sulisut, quersuarni sulisut, eqqiaasartut allallu sulisut assigiinngitsut, isumaqatiginninniarnerigaluit kinguneqanngitsut pissutaallutik suliumajunnaarput.
Isumaqatigiissut atuuttoq maajip aallaqqaataani 2024-imi atorunnaarpoq.
Kisianni isumaqatigiinniarnikkut naapiffeqarsinnaajunnaarneq ajornartoortitsisimavoq, sulilu isumaqatigiissusiortoqarani.
Sapaatip akunnerata siuliani Jyllands-Posten allappoq, Savalimmiuni sulisut 5.000-it missaanniittut suliumajunnaarsimasut. Taakku Savalimmiuni innuttaasut 10 procentiinik amerlassuseqarput.
Suliumajunnaartoqarnerata kingunerisaanik ataatsimoortumik angallassinerit uninngasunut ilaapput. Ambulancit benzinamik peqqumaatillit aammalu tavxat innaallagiatortut kisimik maanna ingerlaarsinnaapput.
Maajimi kunngi Frederik aamma kunngissaq Mary siullermeerlutik Sverigemut Norgemullu Kunngikkormiutut tikeraarnerminnut aallarput.
Kunngip umiarsuaa "Dannebrog" sapaatip akunnerani tullermi avannamut ingerlaqqissaaq, tassani naalagaaffeqatigiinnermi nunat, Savalimmiut Kalaallillu Nunaat tikeraarneqartussaallutik. Maannali tassa Savalimmiunukarnissaat piffissaligaanngitsumik kinguartinneqarpoq.
/ritzau/
