Lars Abelsen Arctic Young Chefimi kalaallit unammineranni ajugaavoq
Nunatsinni inuusuttut igasut inuusuttut Arctic Young Chefimut ajugaaniutivinnissamut maajip aqqarngani unammipput. Unammineq Atuarfik Mathias Storchimi pivoq, tassani igasut nuna avannarlerneersut ajugaaniutivinnissaannut anngunniullutik unammipput. Kalaallit pikkunartumik unammereerlutik Lars Abelsen, Hotel Arcticimeersoq ajugaavoq. Taamaalilluni Lars Abelsen Norgemi Arctic Young Chefimi ajugaaniutivinnermi Kalaallit Nunaat sinnerlugu peqataasussanngorpoq.
Lars Abelsen Arctic Young Chef kalaallinut unammisitsinerani ajugaasuuvoq.
Foto: Jakúp Sørensen
Arctic Young Chefimut unammineq maajip ulluisa aqqarngani, Ilulissani Atuarfik Mathias Storchimi pivoq.
Lars Abelsen ajugaavoq, Ivalu Hansen Zeebilu normu 2-nngorluni. Allat peqataasut tassaapput Minik Fisker aamma Mikisoq Bendtsen.
Pisariunngitsoq, iluarusunnartoq kusanartorlu
Inuusuttut sisamat unamminerminni naliliisussat sunnerniartussaavaat, taakkuuppullu North-Norwegian Competence Center for Food (MAT) aamma ArktiskMat-imi pisortaaneq. Hotel Arcticimi iggavimmi pisortaq Michelinimi ullorannassimasoq, kiisalu Hotel Arcticimi pisortaaneq.
Lars Abelsenip ajugaassutigai siuleqqiut eqalussuup nulia siatsivikkut siataq, bacca tuillelerlugu, kuloruujut iffiorfikkut siatanik akusaq hvidløgimillu miseqqerlugu. Pingaarnertullu puisi tanitaq siatsivimmut siataq, rødvinimik miseqqerlugu rødbedit qillertumik qallikkat pupiillu siatat aamma ajugaassutigai.
Unamminermi nerisassat nalinginnaasumik atorneqartorsuunngitsut ukkatarineqarput. Unamminermilu oqariartuutigineqarpoq eqalussuup nulia kalaallit iggaviini tusaamasanngornissaat, aammalu puisi inuusuttuni naleqartinneqarnerulernissaa.
Unammineq pikkunartoq
Unammineq pikkunartuusoq, ajugaasoq Lars Abelsen oqaluttuarpoq:
- Unamminarpoq, kisianni aamma ilikkarnaqarluni.
Lars Abelsen Ilulissani Hotel Arcticimi igasutut ilinniartuuvoq.
- Aamma isumaqarpunga pingaaruteqarluinnartoq nerisassat ullumikkut immaqa nalinginnaavallaanngitsut nerisassiarinissaat pingaaruteqartoq.
Larsi taamaalilluni Kalaallit Nunaat sinnerlugu Norgemi ajugaaniutivinnermut peqataasussanngorpoq. Unamminermi Islandimeersut, Savalimmiuneersut Norgimeersullu naapissavai.
Unamminissaq tulliuttoq
Nunami unamminerup tullia Savalimmiuni Klaksvíkkimi aggustusip aqqaneq-aappaanni pissaaq, naggaserneqarlunilu Norgemi Mosjømi septembarip ulluisa aqqaneq aappaanni.
Ajugaaniutivinneq Bodø-mi pissaaq, tassani Europæisk Kulturhovedstadi pissaaq.
Arctic Young Chef igasunut inuusuttunut 30-t inorlugit ukiulinnut Kalaallit Nunaannit, Islandimit, Savalimmiunit Norgemiillu unammisitsivoq. NORA - Nordisk Atlantsamarbejde - unammisitsinermik tapersersuillunilu aaqqissuisuuvoq.