Lisa Kreutzmann siullermeerluni Nuummi kisimiilluni saqqummersitsilersoq
Lisa Kreutzmann siullermeerluni saqqummerserterngaaleruni eqqumiitsuliani Uumasut akornanni Nuummi Eqqumiitsulianik saqqummersitsivimmi februaarip 15-anisaqqummersissavai
Nuummi Eqqumiitsulianik Saqqummersitsivimmut februaarip ulluisa 15-anni iseraanni ilaatigut takuneqarsinnaassaaq timmiaq tuullik Tyrannosaurus Reximut akuliussimasoq. T-rex Lisap nammineq kammannguarinerarpaa.
- Najukkameersut nunalu tamakkerlugu isumassarsiat, aammalu silarsuarmut
soqutiginninneq najukkaminullu minguitsumik unneqqarissumillu attaveqarnera Kreutzmannip eqqumiitsuliaani takussaapput. Kreutzmannip nunaqqataasa ilai arnat nukittuut eqqumiitsuliaani ilaapputtaaq; Batmanitut kiinarpallit, aamma Canadami nunap inoqqaavisa arnartai piginnaatitaaffitik pillugit ilungersuuteqartut ilaatittarlugit. Eqqumiitsuliaani ilisimasaqarusussuseq aammalu najukkamiittunik silarsuarmillu annertuumik alapernaatsuuneq malugineqarsinnaapput, Nuummi Eqqumiitsilianik Saqqummersitsivimmi katersugaasivilerisoq Hanne Kirkegaard tusagassiuutinut nalunaarummi allappoq.
Asi isumassarsiorfigisaraa
Nuummi Eqqumiitsulianik Saqqummersitsiviup oqaluttuaraa Lisa Kreutzmann 1981-imi Kangaatsiami inunngortoq tassanilu suli najugaqarluni. Lisa 2000-imi 2005-imilu Eqqumiitsuliornermik Ilinniarfimmi ilinniartuuvoq, kingornalu Danmarkimi kunsthøjskolemi aammalu The Drawing Academy-mut The Animation Workshop-imiittumi 2009-mi peqataaffigalugu.
Maanna Lisap ukiuni 15-inngulersuni kalaallit eqqumiitsuliortut peqatigiiffiat KIMIK
ilaasortaaffigivaa. Eqqumiitsuliai peqatigiiffiup saqqummersitsisarneri aqqutigalugit ilisimaneqartuupput, aammali allakkanut meqqiliaanit illunillu pinnersagaanit ilisimaneqarlutik – ingammik Ilulissani eqqaanilu illut pinnersarsimasai.
- Asimi sissami uumasuni, oqaluttuatoqqani assitoqqani, allarpassuarnilu isumassarsiortarpunga. Oqaluttuatoqqat soqutigisaraakka, tassa inuit uumasullu pissusilersorneri ilusaallu. Titartaariaaseq qalipaariaaseq qanganisarpalaartoq artorlugu nuannaraara. Ukiuni kingullerni eqqumiitsulioriaaseq qangarnisarpalaartoq nutaaliaanerusorlu akuleriisillugit sammisarilernikuuakka, Lisa kreutzmann oqarpoq nangillunilu:
- Titarnerit tamarmik isumaqarput. Uannut nuannaarutaavoq tupinnartoq, uummatima kassunneranik sukkanerulersitsisartoq. Assilialioraangama qamuuna uannut attuinissaat pingaartittarpara allanullu nuannaarutaanissaa kissaatigisarlugu. Eqqumiitsuliat allat suliaat uannut nuannaarutaasumik tunisisarmata uanga aamma tamanna allanut ingerlateqqikkusuttarpara, Lisa Kreutzmann naggasiivoq.
Saqqummersitsineq Aningaasaateqarfik Sermeq, KNI A/S aamma Eqqumiitsuliornermik Aningaasaateqarfik tapersiisoralugit pilersinneqarpoq, saqqummersitsinerlu maajip aqqaneq aappaat ilanngullugu takuneqarsinnaassalluni.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...