Liv Aurora Jensen Canadap illoqarfiata annersaani immikkut saqqummersitsisoq
Inuit pillugit naqitat assigiinngitsunik ilusillit qalipaatillillu Canadap illoqarfiisa annersaanni, Torontomi maannakkorpiaq saqqummersinneqarput. Liv Aurora Jensen Inuk Designimik aamma pilersitsisimasoq eqqumiitsuliaminik saqqummersitsisuuvoq. Eqqumiitsuliortup suliani Harbourfront Centerimit saqqummiunneqarniartut paasitinneqarami nuannaarnermit talini quleriinnalersimavai.
Liv Aurora ullut ilaanni mailiminik ammaagami, Canadap illoqarfiisa annersaanni saqqummersitsinissamut qaaqqusaasimalluni takugamiuk tupaallassimaqaaq.
-Maili atuaqqaarakku pimoorullugu tigusimanngilara, isumaqarlunga mailit ilumuunngitsorpassuit tigusartakkat ilagiinnaraat. Peqqissaarunnerullugulu atuarakku aamma upperivilivissimanngilara, Liv Aurora Jensen oqarpoq, nangilluniluni:
- Harbourfront Centerilli skype-kkut attavigimmaga, ingillunga tamanna ilumoornersoq takuniarlugu talikkut imminut pussuttariaqarsimavunga. Ilumoorporlumi, Liv Auroa Jensen 2001-imili Inuk Designimik pilersitsisimasoq oqarpoq.
Inuk Design immikkut ittumik saqqummersinneqartoq
Suliarisimasai Harbourfornt Centerimi saqqummersinneqaannanngillat, saqqummersitsinermili tamarmiusumi suliarisimasai immikkut inissillugit saqqummersinneqarput. Harbourfront Centeri tamakkerlugu Inuk Designip ilisarnaataanik tapetilersorneqarsimavoq, karsiusallu igalaaminiusut arfineq-pingasut atorlugit saqqummersitsisoqarluni, taakku tamarmik Inuk Designimik naqitanik saqqummersitsiviullutik.
- Nordic Bridges, nuna tamakkerlugu suliniutaasoq, 2022-mi januaarimiit decembarimut nunani avannarlerni eqqumiitsulianik aamma sammisat assigiinngitsut iluini kulturimik ukkataqarniarpoq. Harbourfront Centeri Canadami nutaaliortutut, tamatigoortunik eqqumiitsuliortarnermik kultureqarnermillu suliffeqarfittut, Canada tamakkerlugu kulturikkut aaqqissuussisartut suleqatigalugit Nordic Bridgesimik aaqqissuussamik aqutsissaaq. Suliniut Canadami takuniaasut eqqumiitsuliortullu akornanni oqallinnermik pilersitsissaaq, tassa Nunat Avannarliit nutaaliaannik saqqummersitsinermi. Harbourfront Centeri Liv Auroa Jensenimik qaaqqusinermini ilaatigut allappoq.
Liv Aurora Jensen corona pissutigalugu nammineerluni saqqummersitsisoqarnissaanut najuukkiartorsinnaasimanngilaq. Inuk Designip immikkut ittumik saqqummersinneqarnera januaarip 21-aniit aallartippoq, martsillu 20-ani unitsinneqassalluni.