Liv Aurora Peter Jensenilu Naalakkersuisut kulturikkut nersornaasiuttagaannik nersornaaserneqarput
Ilusilersuisartoq Liv Aurora Jensen filmiliortartorlu Peter Jensen Naalakkersuisut Kulturikkut Nersornaasiuttagaannik nersornaaserneqarput.
Kulturikkut nersornaat ukioq manna aappariinnut ilusilersuisartumut Liv Aurora Jensenimut filmiliortartumullu Peter Jensenimut tunniunneqarpoq.
Naalakkersuisoq Aqqaluaq B. Egede Nuummi Katuami nersornaatinik tunniussisuuvoq, Namminersorlutik Oqartussat paasissutissiipput.
Liv Aurora Jensen suliffeqarfimmik Inuk Designimik piginnittuuvoq, naalakkersuisullu taassuma aallarnisaanerup, ingerlatsisunik namminersortunillu allanik pisortanilu sullissivinnik suleqateqarnerup, tv-imut ilusilersukkanik suliaqarnerup naqitsisarnerup annoraaminernut naqitsisarnermik ilusilersuisarnerup ilusilersuinerullu iluanni ukiut 30-t sinnerlugit misilittagaqarnera pingaartillugu eqqaavaa.
Avammut nioqquteqarnissamik pingaartitsinera erseqqissaatigigaa
- Anguniagaalu tassaajuaannarsimapput isumassarsiat sapinngisamik pisariinnerpaamik kusanarnerpaamillu ersersittarnissaat. Suliffeqarfiutaanilu isumalioriaaseq tassaavoq nioqqutinik avatangiisinut mingutsitsinngitsunik, inuppalaartunik pitsaasunik avatangiiseqarluni inuillu pisinnaatitaaffiinik malinnittunik sulisitsisoqarluni tunisassiarineqartunik, tunisassiornissaq, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede, ilaatigut oqarpoq.
Ilusilersuisartup Kalaallit Nunaannit avammut nioqquteqarnermik pilersitsinissamik pingaartitaqarnera naalakkersuisup aamma erseqqissaatigaa.
Aqqaluaq B. Egede Peter Jensen pillugu ilaatigut erseqqissaassuteqarpoq, taanna filmiliortartuusoq imminut ilinniartissimasoq maluginiarnartoq, ukiorpassuarni namminersortutut inuussutissarsiortuusimasoq.
- Kalaallit Nunaanni filmiliornerup silarsuaani maligassiuisuuvoq pingaarutilerujussuusimallunilu takutitassiarpassualiorsimasoq piffissallu ingerlanerani filmiliortartunik nutaanik ilinniagaqartitsisimasoq. Inuunerata annersaa tusagassiuutinut tunngasunik suliaqarnermut tunngassuteqarsimavoq, pingaartumik filmiliornermut tv-iiliornermut tunngasuni, Aqqaluaq B. Egede oqarpoq.
Uini tapersersuiuaannarsimaneranut qutsavigigaa
Liv Aurora Jensenip malunnartumik killitsisimarpalulluni nersornaammut Naalakkersuisut qujassuteqarfigai. 1987-imi Kalaallit Nunaannut uternerminiit allanngoriartornermik qanoq aqqusaagaqarsimanini oqaluttuaraa:
- Angalaneq tamanna aqqutigalugu titartaasalerlungalu qalipaasalerpunga pinngorartitsisalerlungalu. Kalaallit kulturiannik sutigut tamatigut tigooraavunga, tamannalu naggaterpiaatigut pinngorartitani assigiinngitsuni, oqaaserilikkanni, ersersinneqarpoq, Liv Aurora Jensen oqarpoq, uinilu uummammit pisumik aamma qujassuteqarfigalugu:
- Uinnik naapitsinera inuuninni piffissamut nutaamut aallarniutaalerpoq, illit inuttut pinngorartitsiumatuutut isigigamma piumasaqaatitaqanngitsumillu pinngorartitsinissamut kiffaanngissutsimik tunigamma. Upperinninnerit, asanninnerit tapersersuinerillu allanngortitassaanngitsoq tunniussimanngikkaluarukkit ullumikkut maaniissimanavianngikkaluarpunga Inuk Designilu piusimanavianngikkaluarluni.
Kulturikkut nersornaat 50.000 koruuninik aningaasartaqarpoq. Nersorunaat inummut ataatsimut arlalinnulluunniit imaluunniit kattuffinnut kulturikkut immikkut ittumik suliniuteqarsimasunut tunniunneqartarpoq.