Malunnartitsineq: Angut piginnaanerpassualik
AG Moses Olsenimik atuakkiortutut malunnartitsinermut peqataavoq, tassanilu politikkimik suliaqarsimanera, atuakkiortuunera taalliaalu paniinit ikinngutaanillu qaninnerpaanit nunatta atuagaateqarfiani nersorniarneqarput.
Kakkaak inoqangaarami, pingasunngornermi unnummi taartumi atuagaateqarfimmut apuukkama eqqarsarpunga.
Inuit aggiasimapput Moses Olsen malunnartinniarlugu. Ajunngitsuuguni 85-inik ukioqalerluni inuuissiorfissarigaluarpaa. Ah, taamaammat-una qaqortumik qalipaatilimmik lagkagerujussuaqartoq, paasisaqariataarpunga. Moses Olsenip atuakkiortutut malunnartinniarneqarneranut Nunatta Atuagaateqarfianit aaqqissuunneqarsimasumut inuit assigiinngitsunik tamanik ukiullit, inuusuttut utoqqaallu, takkussimapput.
Aviisi AG taama allappoq.
Moses Olsenip ilaqutai qaninnerpaat saarlerpaami issiapput, ilaatigut uillarnera ullumikkut 80-inik ukiulik Elisa Olsen. Arnaq Kalaallit Nunaanni Namminersornerulernissaq pillugu eqqarsaatit pilersinneqarmata peqataasoq. Moses Olsenimi Folketingip 1972-imi ammarneqarnerani oqaluttuarisaanermut ilannguttussamik saqqummiussivoq, taamani EF-mut innuttaasunik taasisitsisoqarnerani naaggaartoqarnerata kingorna Kalaallit Nunaata attaveqarnera pillugu taasisitsisoqarnissaanik piumasaqarami.
Simon Johansínguaq Moses Valdemar Olsen Sisimiunik juunip 10-ani 1938-mi inunngorpoq. Nutserisutut translatøritut ilinniagaqarsimavoq, 1971-imi Folketingimut ilaasortanngorluni, kiisalu Lars Emil Johansen aamma Jonathan Motzfeldt peqatigalugit nunatsinni partiit annersaat socialdemokratiskiusoq 1977-imi pilersillugu, taavalu taalliortuulluni atuakkiortuullunilu.
Ujarneq Fleischer Moses Olsenip taalliaanik inersuup teqeqquanit talerperlermit tassanngaannaq nipituumik atualermat niaqora taassuma tungaanut saatipallappara. Inersuaq tamaat tiguarpaa nipaallilluinnarporlu.
- Aperissagumma sooq allattartunga, sooq pitsiortartunga, sooq taalliortartunga, Moses Olsenip taalliaa nuannarineqarluartoq ”Nassuiaat” Ujarneq Fleischerip atuarpaa.
Aviisimi AG-mi atuarnerusinnaavutit. Aviisi uani pissarsiariuk:
