Meeqqanut cd nutaaq
Naliliineq: Rock-imik nipilersortartoq Anda Uldum qitulisimaarluni meeqqanut cd-liorpoq
Ilisimaneqarneruvoq guitar-imik sakkortusaasersukkamik kukkilattutut qatanngutini Ib aamma Simon Uldum peqatigalugit rock-imik nipilersortartuni DDR-imi. Maanna Anda Uldum kisimiilluni saqqummersitsivoq meerarsiummik taallugu »Angakkuakkatut«.
Ippernaq ilagalugu angalaneqarpoq, qimussertoqarpoq allaammi Kina aamma tikikkujaat cd unnussiummik naggaserneqartinnagu.
Anda Uldum-ip cd-liaa mikinersatsinnut eqiiallaataavoq anginerumaat tusarnaaqataaffigisinnaasaat. Maanna arlalissuanngorput meeqqanut cd-liaasartut naallu meerarsiutaativut ilisimaneqareersut nuanneraluaqisut nutaartugassanik aamma amigaateqarnarsisarpoq.
Anda Uldum-ip meeqqat silarsuat iserfigisimavaa panini Julia Uldum aamma soralussi Simon ”Daadu” Uldum Jr. aqqutigalugit.
Anda Uldum-ip aamma immiussisarfimmi suleqatigisimavai nipilersortartut arlallit pikkorissorsuit immiussap pitsaassusaanik qummut nusutseqataasimasut.
Anda Uldum-ip cd-liaa »Angakkuakkatut« pingasunik Sermitsiannappoq.