Meeqqat ataatsimeersuarnerat: Meeqqat sunngiffimminni sammisassaat nalilersorneqassapput
Marlunngornermi meeqqat nunatsinni sumiiffinnit assigiinngitsuneersut ataatsimeersuassapput. Ataatsimeersuarnermi meeqqat sunngiffimminni sammisassaqarnissamut pisinnaatitaaffii periarfissaallu immikkut sammineqassapput - toqqissisimaneq, peqataatitsineq, ataatsimullu pinaveersaartitsineq qitiutinneqarlutik.
Marlunngornermi meeqqat inuusuttullu 26-it nunatsinni sumiiffinnit assigiinngitsuneersut ataatsimeersuassapput. Ataatsimeersuarnermi meeqqat sunngiffimminni sammisassaqarsinnaanissaminnut pisinnaatitaaffiat naapertorlugu ingerlatsisoqarnersoq nalilersorneqassaaq.
Ataatsimeersuarnermimi peqataasut oqallillutik naammassigunik ataatsimoorlutik innersuussutissaminnik suliaqassapput, tassani pingaarnerutinneqarluni meeqqat sunngiffimminni sammisassaqarnissaminnut periarfissaqarnerat qanoq suli pitsaanerulersinneqarsinnaanersoq.
UNICEF Kalaallit Nunaat ilisimatitsivoq meeqqat inuusuttullu ataatsimeersuarnermi peqataasussat tamarmik Meeqqat Isueersorfianneersuusut, taakkulu kommuninit tallimaasunit aggerfeqartut, tamatumalu qaavatigut Qaanaamiit aamma Tasiilamiit peqataasoqassasoq, kingulliit taaneqartut immikkuullarissumik oqaaseqartuummata.
Inersimasut oqalugiassapput
Meeqqat inuusuttullu eqimattakkaarlutik oqallinnissaasa naggataatigullu innersuussutissaminnik suliaqarnissaasa saniatigut, inersimasut arlalissuit sinaaniit malinnaassapput aammalu oqalugiassallutik.
Oqalugiartussat tassaapput borgmesterit arlallit (Sermersooq, Avannaata og Qeqertalik), taakkulu saniatigut Naalakkersuisut siulittaasuat, Meeqqat Oqaaseqartartuat MIO-meersoq kiisalu aaqqissuisut sinnerlugit UNICEF.
Innersuussutissatut meeqqat ataatsimeersuarneranni isumaqatigiissutigineqartut, piareersarlugit suliarineqareerunik Naalakkersuisunut Kommuninullu tunniunneqassapput novemberip ulluisa 24-ianni.