Meeqqat innarluutillit Sisimiuni assinik saqqummersitsinermi silarsuatik oqaluttuaraat

Kulturikkut illorsuarmut Taseralimmut iseraanni pinngortitamut assit tunngasut arajutsisassaanngillat. Assimmi taakku meeqqat innarluutillit assilisaraat.

Ammaanersiornermi meerarpassuit takussapput, taakkuuppummi ullormi inuttat pingaarnerpaasut:

Aqqalukkuluk, Bertheline, Barselaj, Hans Jakob, Maren, Isabella, Apu, Dina, Fritz, Jørgen-Juaaka, Sikkersoq, Qillaq, Kuannia, Kristian, Nivinnguaq aamma Qarsoq.

Innarluutillit oqaaseqartartuat saqqummersitsinermi najuutinngilaq, sulisuili ammaanersiornermi najuupput.

Ammaanersiornermi Tilioq-mi pilersaarusiornermik suleqataasoq, Aannguaq Reimer-Johansen oqalugiarpoq:

- Ullormut takkuttunut tamanut qujanarujussuaq, qilanaarinikuusarput kiisami pivoq. Tiliuminngaanniit nuannaarutigisorujussuuarput ulloq manna piviusunngortissinnaagatsigu, piviusunnngortissinnaajunnanngilaq tamatta taama kusanartigisumik suleqatigiissimanngikkaluarutta, Aannguaq Reimer-Johansen oqlaugiarnermi oqarpoq nangillunilu:

- Assilissani meeqqat silarsuaanut, takusaanut, sekundiarannguaq tikilluaqqusaagatta, isumaqarpugullu tamanna meeqqat tunniussaat annertoorujussuusoq, mianeralugu naleqartitassarput. 

Assiliisoq ilinniartitsisoralugu

Assinik saqqummersitsineq assiliisartoq Arnajaraq Støvlbæk suleqatigalugu piviusunngortinneqarpoq. Taanna ilinniusiamik suliaqarsimavoq atuartitsinermi atukkamik. Taamaaliornikkut meeqqat assiliinermik ilinniartinneqarput. 

Meeqqat pinngortitami silarsuaat

Taseraliup iigaani assilissat nivingasut pinngortitamut tunngasuupput. Assilissanik saqqummersitsinermi "Pinngortitaq tamatsinnut" qulequtaritinneqarpoq. Suliniummi utoqqaat aamma suliniuteqaqataapput.

Assilissat decembarip 31-ta tungaanut takuniarneqarsinnaapput.