Misiliutip kalaallinut naleqqussarneqarnera unitsikkallarneqartoq
Danmarkimi nuna tamakkerlugu angajoqqaat piginnaasaannik misissuisarnerat oqaatsitigut kulturikkullu Kalaallit Nunaannut naleqqussarneqarnissaa, socialministerip ukiup aallartinnerani nalunaarutigaa. Kisianni maanna sulineq unitsikkallarneqarpoq, ilimagisamit annertunerunerata paasineqarnera pissutigalugu. Taarsiullugu 2024-mi misissueqqaarnernik suliaqartoqassaaq.
Danskit isumaginninnermut ineqarnermullu ministeriata Pernille Rosenkrantz-Theilip upernaaq isumaginninnermut, peqqissutsimut suliffeqarfeqarnermullu 2023-2026-mut isumaqatigiissut (SSA) saqqummiuppaa. Danskit kommuniisalu meeqqamik angerlarsimaffiup avataanut inissiinnginnermi nuna tamakkerlugu angajoqqaat piginnaasaannik misissuisarnerup kalaallit oqaasiinut kulturiannullu naleqqussarneqarnissaa suliniutinut ilaavoq.
Aviisi Sermitsiaq taama allappoq.
Inuit Pisinnaatitaaffii pillugit Ilisimasaqarfik aamma paasisimasallit arlaqartut danskit misiliutaannik kalaallinut atuisoqartarnera sakkortuumik isornartorsiorpaat, angajoqqaat pisinnaasaannik aamma misigissutsikkut inuunerannik eqqortumik takutitsinnginnerat pissutigalugu, taamaalillunilu meeqqat angajoqqaaminnit eqqunngitsumik tunngaveqartumik peerneqartarnissaannut aarlerinaateqarmat.
Suliaq annertooq
Kisianni taanna suliaq unitsikkallaarneqarpoq, tamanna SSA-mik 2024-2027-mut isumaqatigiissutigineqaqqammersumi atuarneqarsinnaavoq. Tassani ”eqqarsartaatsikkut misileraanerit kalaallisuunngorlugit nutserneqarnerinik naleqqussarneqarnerinillu suliniut 2023-mi piffissaliunneqartup iluani naammassineqarsinnaanngitsut” allassimavoq. Taarsiullugu 2024-mi misissueqqaarnermik suliaqartoqassaaq, taanna kingusinnerusukkut suliap ingerlaqqinnissaanut tunngaviliisuussaaq.
Aviisimi Sermitsiami atuarnerusinnaavutit. Aviisi uani pissarsiariuk:
