Misissuineq: Inuit qallunaanit uppinnaveersaallaqqinnerupput
Kalaallit utoqqaat danskinit peqatiminnit uppinnaveersaallaqqinnerupput. Maannamut misissuinerit tamanna takutippaat. Nakorsanngorniartut inuit akornanni assaminnik tigusinikkut nukittussusaat aamma qisuariartaatsinik aamma misissuiniarput.
Aalborg Universitetshospitalimi nakorsanngorniartut ulluni makkunani inunnit kingoqqisuni uppinnaveersaarnermi piginnaasanik, assammik tigusinermi nukittussutsimik aamma qisuariarnermi sukkassutsinik uuttortaaleruttorput. Misissuinerit Nuummi qaammammi kingullermi ingerlanneqarput, sapaatip akunneranilu matumani Sisimiuniissapput.
- Uppinnaveersaarnermut tunngatillugu pitsaasumik isikkoqartoq isumaqarpugut, kisianni suli amerlasuut misissunngilagut, paasissutissat tamarmiusut pigilertinnagit aamma danskit innuttaasut assinganik misissorneqarnerannut suli sanilliukkuminaapput, nakorsanngorniartoq Jacob Bjerge Christensen, Sermitsiaq.AG-mut oqarpoq.
Jacob Bjerge Christensen aamma Mads Blak Rønbergip kalaallit timimikkut piginnaasaat misissussallugit aalajangerput, kalaallit utoqqaat danskinut peqatiminnut sanilliullutik qaqqamiillutillu apummi sermimilu nalinginnaasumik uppinnaveersaallaqqinnerunerat nakorsat nikerartut tupigusuutigisarsimammassuk. Avatangiisit pinngortitarlu assammik naqitsinermi nukittussutsimut, qisuariallaqqissutsimut aamma uppinnaveersaarsinnaanermut inuiaqatigiit assigiinngissutaannut tunngaviusinnaasut, nakorsanngorniartut tassani oqaatigaat.
Qallunaat utoqqaat uppinnaveersaartarnerminni pitsorlunnerusut aamma toqusoqakulasarneranut attuumassuteqartoqarnera paasineqarnikuuvoq.
Naqitsisinnaassuseq qisuariarsinnaassuserlu
- Tamatuma saniatigut misissuinerni amerlasuuni assammik naqitsisinnaassutsip aamma toqukulassutsip akornanni annertuumi attuumassuteqartoqarnera takuneqartarpoq. Taamaammat innuttaasut akornanni assammik naqitsisinnaassueqarnerup assigiinngissuteqarnera nunarsuarmi sumiiffini assigiinngitsuni soqutiginartuuvoq, Jacob Bjerg Christensen oqarpoq.
Aalborg Universitetshospitalimi atortumik ineriartortitsisoqarsimavoq, tassani Wii Balance Board spillimeersoq uppinnaveersarnermut, qisuariallaqqissutsimut aamma talini nissunilu nukittussutsinut uuttortaanermut atorneqartarpoq.
- Uuttortaanerit taakku uppissinnaanermut aamma uppinnginnissamik pinngitsoortsitsinissamut tunngatillugu sukkut qanorlu iliorsinnaanermut atorneqarsinnaapput, taanna oqaluttuarpoq.
Kinguaariit tamarmik ilaassapput
Nakorsanngorniartut taakku marluk 19. septembarimili Nuummiipput. Maanna Sisimiuniissapput, 1. novembarip tungaanut tassaniissallutik. Nakorsanngorniartut taakku marluk aappagu misissuinermit paasissutissat tunngavigalugit allaaserisamik saqqummersitsiniarlutik naatsorsuuteqarput.
- Siunissami kalaallit innuttaasut akornanni uppittarnerit qanoq pinaveersaartinneqarsinnaanerinut isumaliuteqarnissamut inernerit atorneqarsinnaassasut neriuutigaarput. Innuttaasut sanngiissusaat assigiinngitsuuppata, uppittarnerup pinaveersaartinneqarnerani assersuutigalugu Danmarkimit allaanerusinnaanersoq isumaliutigineqarsinnaavoq. Pisortat illuutaasa aamma illoqarfimmi assigiinngitsut qanoq aaqqissorneqarnissaannut immaqa atorneqarsinnaavoq, tikinneqarsinnaanerat innuttaasunut tamanut sapinngisamik pisariinnerulersillugu, Jacob Bjerge Christensen oqarpoq.
Nakorsanngorniartut taakku marluk inersimasut tamarmik akornanni ukioqatigiinni tamani piginnaasaannik misissuipput.