Nanook pinngorfimminni appileqaat
Nipilersortartut sallersaasui illoqarfimmi meeraaffigisimasaminni Nanortalimmi nipilersorniarput
Tallimanngorneq 4. februaari rockimik nipilersortartut nuannarineqaqisut »Nanook« oqaluttuarisaanerminni siullerpaamik Nanortalimmi timmersortarfissuarmi nipilersussapput. Tamanna qatanngutigiinnut erinarsortartuusunullu Christian aamma Frederik Elsnerimut misigisaassaaq immikkut ittoq, taakku marluullutik aamma nipilersortartuni guitarertartuupput. Tassami inuusuttuunermik annertunersaat nunatta illoqarfiisa kujasinnerpaartaani, 1400-t missaannik inoqartumi, najugaqarsimapput.
- Pileqqaarfitsinni nipilersornissarput assorsuaq qilanaaraarput, Christian Elsner oqarpoq.
Timmersortarfissuup pisortaata naatsorsuutigaa tusarnaartitsinermut inuppassuit aggianissaat.
- Tusaamavarput Qaqortumiit aamma Narsamiit sila ajunngippat tusarnaartitsinermut tusarnaariartoqarniartoq, ingammik GU-mi aamma NI-mi iliniagaqartut, Henning Olsen oqaluttuarpoq.
Illoqarfimmi nipilersortartut nalunaaqutaq 22 aallartillutik kissassaassapput, Nanook nipilersorlutik nalunaaqutaq 23.00-imit - 01.00-ip tungaanut nipilersussallutik. Tusarnaartitsinermik aaqqissuisuupput timersoqatigiiffik Siuteroq '43.