Nanoq Sisimiut eqqaani pisarineqartoq
Nanoq Sisimiunit 2-4 kilometeriinnarnik ungasitsigisumiittoq ippassaq pingasunngornermi takuneqarpoq. Kinguninngua piniartunit tallimanit pisarineqarpoq illoqarfimmullu angerlaanneqarluni. Innuttaasuniit alutorsaatigineqaqaluni sissami pilanneqarpoq.
Lars Berthelsen, Unotut nalunnginneqartoq Sisimiut eqqaani sikuiaaniarluni umiatsiaminiippoq. Ullormi nalinginnaalluinnartumi tassani nanumik takunissani naatsorsuutiginngilluinnarsimavaa. Sisimiullu eqqaani nanoqarneranik sianerfigitilluni nalunaarfigineqarpoq.
- Naatsorsuutiginngikkaluarluguuna sikuiaaniarluta Sisimiut avatinnguani qinngutinik takusoqariataarsimagami illoqarfimminngaanniit. Taava kalerrinneqarama, nalunngisara ataaseq kalerriinnariarlugu aallapallakkatta, Lars Berthelsen Sermitsiaq.AG-mut oqaluttuarpoq.
Taanna nalunngisanilu avalammata umiatsiaaqqat allat marluk sikuiaasoqarsoralugu malinnaapput, nalusimavaallu nanoqartoq.
Paasinarsivoq nanoq kilometerit marluk sisamallu akornanni Sisimiunut qanitsigisumiittoq.
- Anguneq ajuleraluaratsigu sikorsuaq mattunermik aamma nanoq sikukkut qimaagami. Tammartarlugulu, qujanartumik nassaareqqittarlugulu pigatsigu. Pissanganaqaaq.
Nanoq 2,50 miiterit 2,70 miiterillu akornanni angitigisoq, Lars Berthelsenip oqaatigaa.
Qummoroortartut
Sisimiormiut nannuttoqarsimasoq ingerlaannaq paasivaat, piniartullu illoqarfimmut tikikkiartulermata nuannaarlutik sissamukaapput qummoroortortoqarlunilu.
- Tikikkatta qummoroortartoqarmat assut qamuuna soorlu nillertorsuarmik kuineqarlunga misigisimavunga, qiiaammerlunga, Lars Berthelsen oqaluttuarpoq.
Piniartut tallimat illoqarfimmut tikimmata Sisimiuni innuttaasut tuaviorlutik sissamukaapput, pisaqartut pilluaqqujartorlugit nanorlu takuniarlugu. Innuttaasut nanoq attuuareeraamikku assilereeramikkulu piniartut pilattuillutik aallartippoq.
Nanoq pilanneqarami timaa suli kissarpoq, pilanneqarneralu innuttaasuniit alutorsaatigineqaqaluni isiginnaarneqarpoq.
- Nunamiissimassagami aqajarua ammaratsigu ivigaannarnik ilumioqarpoq. Kisianni pualaqaaq.
Innuttaasut nannup neqaanik pisinissaminnut periarfissaqassasut taassuma ilanngullugu oqaatigaa.