Nanoq maaniippoq, taakaniippoq sumilu tamaaniilluni.
Aasaq manna amerlasuut siku aqqutigalugu Kujataanukarput, uumasullu qaasuttup tupinnartup ulorianartulli illoqarfiup aqquserngini angalaartoq takullugu inuit ilaannaasa nuannaraat.
Nanoq maaniippoq, taakaniippoq sumilu tamaaniilluni.
Aasaq manna amerlasuut siku aqqutigalugu Kujataanukarput, uumasullu qaasuttup tupinnartup ulorianartulli illoqarfiup aqquserngini angalaartoq takullugu inuit ilaannaasa nuannaraat.
Ulorianannginnerusumilli Tusass Greenland frimærkimik saqqummersitsivoq, 1938-miilli frimærkit 45-ssaanni nannumik assiliartalimmik. Inuk uumasorluunniit alla frimærkitsinni taama atorneqartigisimanngilaq.
Allakkerivik 1963-imiilli ulluinnarsiutaasumik siullerpaamik kunngip assiganik assiliartaqanngitsumik novembarimi 2023-mi saqqummersitsivoq. Issittulli kunngia - nanoq saamiusoq - Kalaallit Nunaata ilisarnaataani takusinnaavarput. Nanoq Kristoffer Guldbrandimit titartagaq Bertil Skov Jørgensenimit ilusilersorneqarsimavoq.
Frimærki nutaaq nannumik saamimik assiliartalik.
Kunngi uterumaartoq, Frederik X-imilli ulluinnarsiutaasumik saqqummersinneqarnissaanut piffissaq pissutaalluni aappaagumut kinguartinneqarpoq. Taamaattumik nannup assiga ilisarnaammi takuneqarsinnaaqqilerpoq; tamatumuuna 18 koruuninik naleqarluni, Kalaallit Nunaanni allakkanut 100 gram tikillugu oqimaassusilinnut umiarsuakkut nassiunneqartartunut atorneqartussaalluni.
Ukiut ingerlanerini ilutsit assigiinngitsut
Allakkerivik novembarimi 2023-mi atuagassiaaqqamik ataqqinaataasumik dronning Margrethe II-mik qulequtalimmik saqqummersitsivoq. Atuagassiaaqqap ataqqinaataasup tigulluarnera isumassarsiffigalugu allakkerivik nutaamik aamma saqqummersitsivoq; matumani nanoq pineqarluni.
Atugassiaaqqami ataqqisaasumi matumani allakkeriviup 1938-miilli frimærkit 45-t nannunik assiliartallit tamarmiusut saqqummersissimasai katersorneqarlutik ataatsimut saqqummersinneqarput. Frimærkit pisortaata Pertti Frandsenip nannup uumasutut piniakkatut aamma oqaluttualiani ilaasartutut oqaluttuaraa. Frimærkit 45-t frimærkiliortut suliaasa qanoq assigiinngitsiginerinik takutitsipput.
Jens Rosing, Thue Christiansen, Naja Abelsen, Buuti Pedersen, Maria Panínguak’ Kjærulff, Robert Holmene, Bolatta Silis-Høegh, Christian Fleischer Rex aamma Gukki Nuka taakkununnga ilaapput. Ágúst Kristinssonip nanoq ima suliarilluagaatigisumik sanavaa 2023-mi ukiumi frimærkitut toqqarneqarluni.
