Nersornaat sølviusoq: James Ignatiussen nersornaaserneqarpoq kattuffilerinermik suliaqarnini pillugu
James Ignatiussen Tasiilameersoq Inatsisartut siulittaasuannit Nersornaammik sølviusumik tunineqarpoq kattuffilerinermik suliaqarnini pillugu.
James Ignatiussen Tasiilameersoq Inatsisartut siulittaasuannit Mimi Karlsenimit (IA) Nersornaat sølvimik tunineqarpoq.
Inatsisartut allaffeqarfiat
Inatsisartut Siulittaasuata Mimi Karlsenip (IA) Tasiilami Hotel Angmassalimmi nalliuttorsiorpalaartumik katerisimaarnermi James Ignatiussen sølviusumik nersornaaserpaa. Tamanna pivoq arfininngornermi juunip 15-iani.
James Ignatiussen ukiorpassuarni Tasiilami najukkamini inuiaqatigiinni piorsarsimassutsikkut peqatigiiffilerinermi annertuumik tunniusimalluni suliaqarsimanerminut aammalu inuunermi sivisuumik sulisimanerminut sølviusumik Nersornaaserneqarpoq.
- Ilagiit sinniisaasa sulineranni ukiorpassuarni eqeersimaartumik ilaasortaasimavutit oqaluffimmilu ajoqitut sulisimallutit. 1999-imi palasinngorputit Tasiilamilu palasitut atorfeqarlutit.
Palasi aamma qilaatersortartoq
- Innuttaasutut tunniusimalluinnarlutit Tasiilami piorsarsimassutsikkut peqatigiiffilerilermi eqeersimaarlutit peqataanerit nunaqqatinnit – aamma Tasiilap avataaneersunit – ilisimaneqaatigaat. Taalliornermik, erinniornermik nipilersornermillu soqutigisaqarluarnerit ilisarnaatigaat, Inatsisartut siulittaasuata diplomimik aamma sølvimik nersornaasiinermini oqarpoq.
Taassuma erseqqissarpaa James Ignatiussen peqatigiiffilerinermik suliaqarnini aalluttuarsimagaa, innuttaasunillu katersuutsitsisinnaassuseqarluni, taamatullu nunatsinni kulturitta piujuarnissaa ingerlateqqinnissaalu sulissutigisaraa:
- Peqatigiiffilerinikkut assigiinngitsorpassuartigut tunniusimasuuvutit, tamatumunngalu ilanngullugu erinarsoqatigiinni aqutsisuullutit erinarsoqatigiinnilu tivaneq akuutittarlugu. Tivanermik ilisimasavit kinguaannut ingerlateqqqinnissaat ilungersuullugu sulissutigisimavat, taamaaliornikkullu tunumiut inooriaasitoqaannik kinguaariinnut tullinnguuttunut ingerlatitseqqillutit, oqaatigineqarpoq.
Inatsisartut ilisimatitsipput, Nersornaat sølvimik sanaajusoq tunniunneqartumut pigitinneqartartoq, Nersornaalli kuultiusoq Kalaallit Nunaata Namminersorlutik Oqartussaannit pigineqarmat, toqusoqarnerani utertinneqartussaasoq.
