Nersornaatit kajumissaallu tunniunneqartut
Seqininnguaq Lynge Poulsen Naalakkersuisunit kajumissaaserneqarpoq. Mads Grønvold, Ullorissani erinarsortuusoq aamma saqqummersittagaq Neriusaaq kulturikkut nersornaaserneqarlutik.
Naalakkersuisut inuiattut ullorsiornitsinni ukioq manna nersornaatinik marlunnik kajumissaammillu ataatsimik tunniussaqassallutik aalajangersimapput.
Kulturimut Naalakkersuisoq, Peter P. Olsen nersornaatit kajumissaallu tunniutilinnginnermini oqarpoq ullumikkut tunineqartussat kulturimut tapeeqataalluarsimasut.
Erinarsortartoq, taalliortoq erinniortorlu Mads Grønvold, Ullorissani erinarsortuusoq aamma atuagassiaq Neriusaaq, nunatsinni kulturimut tunngasunik allaatigisaqartartoq kulturikkut nersornaaserneqarput.
- Erinarsorneq nipilersornerlu kulturitsinni initoorujussuupput. Nipilersorneq uummaarissititsisarpoq nuannaalersitsisarlunilu. Nersornaammik tunineqartussaq siulleq asanninneq, misigissutsit, ikinngutigiinneq pinngortitarlu pillugit taalliortarpoq. Politikki pillugu taalliorneq ajorpoq. Erinarsortartunut allanut tapiisarpoq, taakkununngalu siuarsaaqataasarluni, Mads Grønvold pillugu kulturimut naalakkersuisoq Peter P. Olsen oqarpoq.
- Atuagassiaq kulturikkut nersornaaserneqartussaq nunatsinni kulturikkut pinngorartitsinikkullu sulianik saqqummiussisarpoq. Taamaalilluni kulturimi pinngorartitsinermilu ilisimasanik nunatsinni nunallu avannarlerni tunniussaqartarluni. Ukiuni 30-ni kingullerni kajumissutsiminnik suliaqarlutik atuagassiamut tunniussisimasut inuit 350-it sinneqarput, Neriusaaq pillugu Peter P. Olsen oqaaseqarpoq.
Suliniuteqartoq kajumissaaserneqarpoq
Naalakkersuisut kulturikkut nersornaasiinerminni ukiuni kingullerni ilannguttalersimavaat kajumissaasiineq.
Ukioq manna LGBT+ Greenlandimi siulittaasoq, 19-inik ukiulik Seqininnguaq Lynge Poulsen kajumissaaserneqarpoq.
- Kajumissaaserneqartussap suiaassusermut atoqatigiinnermullu tunngasunik, aamma nunap inoqqaavisa pisinnaatitaaffii pillugit ukiuni kingullerni suliarisarpai. Oqalugiummini pingaartitsisarpoq paquminartut paquminarunnaarsarniarlugit. 2019-imi Arctic Letters Summitimi peqataasimavoq, oqalugiarnerminilu ilinniartitaanermi inooqatigiinnermilu inuit paasisimasaat pingaartinneqarnerulernissaat pingaartissimavaa, Peter P. Olsen Seqininnguaq Lynge Poulsen pillugu oqaaseqarpoq.
Nersornaasiinermit assit allaaserisap qulaani takusinnaavatit.