Nina, Nina, Nina...
Nina Kreutzmann Jørgensen arfininngornermi unnukkut tusarnaartitsimmat tusarnaariat nuannattunnguupput. Atlantic Music Festival Nuummi illorsuarmi timersortarfimmi tusarnaartitsinermik aaqqissuussisuuvoq.
Annonse
- Nina, Nina, Nina, Nuummi illorsuaq timersortarfimmi arfininngormat unnukkut tusarnaariat taama nilliapput. Erinarsortartup nuuteeraq ”Eqqissineq” 2008-mi saqqummersitaa tusarnaarianit nuannarineqartoq malunnarpoq.
Siggartartoqarpoq, ersaattaanneqarluni Nina Kreutzmann-illu saqqummersitaanit kingullermit atuisoqartillugu erinarsoqataasoqartarluni. Erinarsuutit atorneqartut soorlu makkuupput: ”Silarsuaq takuiuk” aamma "Kisimiittutut".
Nina Kreutzmann Jørgensen-ip nuuteeraq saqqummersitaa kingulleq 3.000-it sinnerlugit tunineqarsimammat Nina sølvimik nuuterannitsinneqarpoq. Nuuteeraq erinarsortartumit Tupaarnamit tunniunneqarpoq.