Nina Tasiilamut tikippoq
Erinarsortartoq Nina Kreutzmann Jørgensen Tasiilami tusarnaartitsissaaq. Nuannarinnittaasa illoqarfimmut tikimmat nuannaaqalutik tikilluaqquaat.
Annonse
Erinarsortartoq Nina Kreutzmann Jørgensen sisamanngorpat tallimanngorpallu Tasiilami tusarnaartitsissaaq. Erinarsortartoq Tasiilamut tikikkami nuannarinnitsiminit tikulluaqqulluarneqarpoq.
– Nuannaartorisartik Nina Tasiilami qulimiguulinnut mittarfimmut kiisami tikimmat Tasiilami Alivarpimmi atuartut nuannarinnittut mikinerumaat nuannaaqalutik tikilluaqqusipput, tusarnaartitsinissami aaqqissuisuusut Arctic Wonderland Tours A/S aamma Patrick M. Abrahamsen tusagassiorfinnut nalunaarummi allapput.
Nina Kreutzmann Jørgensen nipilersortartuilu aatsaavissuaq Tunumi tusarnaartitsissapput. Sisamanngornermi hallimi tusarnaartitsissapput tallimanngornermilu Diskotek Pakhusimi.