Nipiiersorqatigiit ’Rockstones’ musikfestivaleriassapput
Sapaatip akunnerani tullermi kalaallit nipilersoqatigiit Aalborgiliassapput musikfestivalimi peqataajartorlutik
Siorna novembarimi Kommuneqarfik Sermersooq meeqqanik inuusuttunillu nipilersornermik unammisitsivoq, taannalu Nuummi katersortarfimmi ingerlanneqarpoq. Illoqarfimmi inuusuttut rockimik nipilersortartut "Rockstones" ajugaapput. Akissarsiassaasimavorlu Aalborgiliarnissaq, tassani 2013-imi januaarip 18-ianni 19-iannilu "Ungdomsringens musikfestival 2013" ingerlanneqassalluni, inuusuttullu nipilersoqatigiit marlunngorpat januaarip 15-ianni aallassapput.
- Qilanaartorujussuuvugut ilaanneeriarlutalu pissangasorujussuanngortarluta. Musikfestivalen 2013-imi Danmarkimi inuusuttunik tusarnaartitsinissarput utaqqisinnaanngingajapparput, sungiusartuaannarpugullu, Ilannguaq Kristiansen "Rockstones"-imi nipilersortartoq oqarpoq.
Nipilersoqatigiit aallannginnerminni tallimanngorpat inuusuttut centerianni NUIF-imi nalunaaqutaq 20.00 akeqanngitsumik tusarnaartitsissapput.