Noah: Immitsinnut ilaarutigillaqqissuuvugut
Noah Mølgaard, marlunnik oqaaseqartumik atuakkamik "Koor' - Hold da op, mand"-imik atuakkiortuusoq quujasaarutissaqangaarami atuakkioqqissinnaavoq
- Danskit quiasaariaasaat inummut allamut tunnganerusarpoq. Kalaallilli quiasaarigaangamik imminnut ilaarutigikkajupput. Soorlu kaffellernerni tamanna malugineqarsinnaasoq. Assersuutigalugu uanga nammineq quiasaarutinni inuit allat taakulanngilakka. Quiasaarutinnili Lars Løkke aamma Inger Støjberg taasareerpakka.
AG-mi tusagassiortup Noah Mølgaardip qallunaat kalaallillu quiasaareriaasaata assigiinngissusaat taama nassuiarpaa. Eqqartorneqartartoq inuit marluk oqaloqatigiinneranni eqqaaneqarnerusarpoq. Quiagisartakkat inuiaqatigiinni suminngaanneertuuneq aallaavigalugu allanngorartarput.
Atuagaq nutaaq
Noah Mølgaard atuakkamik ”Koor´- Hold da op, mand”-imik taaguuserlugu saqqummersitseqqammerpoq, atuakkami 64-inik quppernilimmi qallunaatut kalaallisullu quiasaarutigisartakkaminik allassimalluni.
- Naluarput qanoq sivisutigisumik nunarsuarmiissanerluta. Maanna kalaallit atuakkiaataannut quiatsannartunik ilanngussivunga, aamma isumaqarama quiasaarutinik atuagaatikippallaartugut.
Noah Mølgaard, AG-mi quiatsannartunik ilanngussaqartartutut ilisimaneqartoq, quiasaarisarnini aataminit Abel Reimerimit Ilulissat eqqaanni Oqaatsuneersumit ilalisaatigalugu isumaqarpoq. Mølgaardikkunnilu quiasaarisartut kinguaariit suli unissagunanngillat.
Kingoraarti
- Ernera angajulleq Inutsiaq quiasaarnermik nuannarisaqarluarpoq. Taamaalluta Alaskamiinnitsinni oqarnikuuvoq: Sooruna indianerit cowboybukseqartut uffa akerariillutik?
- Quiasaarutinik nunguutsinngisaannarpit?
- Nammineq quiasaarusiannik suli toqqortaateqarluarpunga. Atuakkap ”Koor´- Hold da op, mand”-ip tullissaanut naammattunik peqalereerpunga.