KL

DK

Nordatlantisk Hus-imi juullimut tuniniaavik: Puisit amii, eqqumiitsuliat juullimullu pinnersaatit

Ileqquusoq malillugu ukioq manna Atlantisk Husimi juullimut tuniniaasoqaqqippoq

Umiaq Kor-ikkut tusarnaartitsilertinnatik assingat.
Knud Fl. Larsen Freelance Journalist
Saqqummersinneqarpoq

Odensemi umiarsualiviup eqqaani Nordatlantisk Husimi juullimut pinnersaaserneqartumi qaleriinni pingasuni tamani pisarnertut tuniaaveqarpoq. Tuniniaaviit 36-t nuersakkanik, igalaaminernik, marrarnik, puisip amianik assassukkanik, eqqumiitsulianik, qalipakkanik, assilianik, pinnersaatinik, atuakkanik juullimullu pinnersaatinik tuniniaapput.

Nordatlantisk Hus-imi juullimut tuniniaavik inuppassuarnit ileqqunngorsimavoq nuannersoq. Nuannaarneq misigalugu. Erinarsoqatigiit Umiaq tusarnaarlugit. Juullimut tunissutissamik pisilluni, immaqalu neriniartarfiup æbleskivenik sassaalliutai ussernartorsiorfigalugit.

Soorunami aamma juullip inua savalimmiormiut umiaasaanut ilaalluni sapaammi ualikkut tikippoq. 2013-imiilli Nordatlantisk Hus-imi Juullimut Tuniniaaneq ingerlanneqartarpoq.

Pisiassat assigiinngitsut

Tuniniaasut assigiinngitsorpassuarnik pissuteqarlutik maaniipput. Soorunami tunisassiaminnik tunisinissaq neriuutigalugu. Soorunami aamma nuannaarlutik tulluusimaarlutillu piginnaanitik takutinniarlugit. Assersuutit ilaat:

Ellen Svendsenip Alluitsup Paaneersuusup maannalu Køgemi najugaqartup puisit amiinik suliani misigisassarsiorluni nuannisarusullunilu suliarisarlugit isertuutinngilaa.

-Tunisaqarluaraluarluta angalanermut akunnittarfimmullu akiligassavut matussusersinnaanngilavut, nuannersorpassuarnilli misigisaqartarpugut. Maaniillunimi nuannertaqaaq, Ellen Svendsen oqaluttuarpoq.

Sigrún Fonndal Sigurdadóttirip atuakkat, atornikut minnerunngitsumillu Islandip juullimut troldii tuniniarpai. Islandip juullip troldii juulli sioqqullugu qaqqanit ammukartarput aallaqqaammullu meeqqanik ersisaarutaallutik. Ukiulli ingerlaneranni inussiarnernerulersimapput. Siulleq decembarip aqqaneq-aappaanni ammukartarpoq kingullerlu decembarip 29-anni ammukartarluni, januaarillu aallartinnerani qaqqanut utertarluni, aatsaallu juulleqqileraangat takkuteqqittarluni.

Otto Motzfeldtip suliniutini ussassaarutiginiarlugu ullut taakku atorpai, tassa arsasinissamut aningaasanik katersuiniarluni, taakkulu Kalaallit Nunaanni kommuninut tunniunneqassapput. Maannamut arsanik 2600-nik aamma atuakkanik katillugit 150.000 koruuninik nalilinnik pissarsisoqarpoq, Milik Publishing suleqatigalugu Kalaallit Nunaanni meeqqanut.

Asta Ignatiussen qaammatini kingullerni nissiaalluni ulapissimavoq. Isersimmatit, qungasequtit tassillu tunivai.

Ingerlalluartoq

Sapaammi ualikkut Nordatlantisk Hus-imi Kalaallit Illuutaanilu pisortaq Annette Lyberth naammagisimaarinnittoq naapipparput.

- Akunnialuit qaangiuppata matugutta inuit 2000-it missaanniittut illumiissimassasut naatsorsuutigaarput, juullimilu tuniniaavinnit allanit unammillerneqarnerput eqqarsaatigalugu tamanna naammagisimaarnarpoq.

Nordatlantisk Hus piffissami aggersumi ulapaarfiussaaq. Juulli sioqqullugu juullimut tusarnaartitsinerit marluk aaqqissuunneqassapput. Rasmus Lyberth aamma Julie Berthelsen Odensemi erinarsussapput. Atlantikup avannaanut tunngasunik juullimut init pingasut aaqqissuunneqassapput. Kiisalu saqqummersitsinerit nutaat marluk ammarneqassallutik.

kulturi

ATORFIIT Se alle jobs

Powered by Labrador CMS