Nunani Avannarlerni Siunnersuisoqatigiit nersornaasiinissaanut kalaallit arlallit innersuunneqartut
Nunani Avannarlerni Siunnersuisoqatigiit kulturimik eqqumiitsuliornermillu suliaqartunut nersornaasiuttagai aqagu Oslo Operami agguaanneqassapput. Kalaallit arlallit nersornaasiuttakkanut innersuunneqarsimapput.
Kalaallit eqqumiitsuliornermik, kulturimillu suliaqartut kiisalu aallarnisaasut tallimat, Nunani Avannarlerni Siunnersuisoqatigiit nersornaasiuttagaannut arlalinnut innersuunneqarsimapput.
Ajugaasut Oslomi Operami marlunngornermi 31. oktober nalunaarutigineqassapput.
NAPA-p kalaallit nersornaatinut innersuunneqarsimasut nersualaarpai:
- Nersornaasiuttassanut piumaneqaqisunut unammillerlutik innersuunneqarsimasut akornanniipput Kalaallit Nunaannit piginnaasallit arlallit, taakku qaffasissusilimmik pitsaassuseqartumik suliarisartakkatik pillugit maluginiarneqarsimapput, NAPA tusagassiorfinnut nalunaaruteqarluni allappoq.
Innersuunneqartullu ukuupput
Oslomi Operami innersuunneqartut taaneqalerpata, atit suliallu tallimat Kalaallit Nunaanneersut aamma taaneqassapput.
Kalaallit uku innersuunneqarsimapput:
- Nunani Avannarlerni Siunnersooqatigiit Avatangiisinut nersornaasiuttagaat: Atornikuerniarfik Pikumini
- Nunani Avannarlerni Siunnersooqatigiit Nipilersornermut nersornaasiuttagaat: SIGU (Johannes Sigurdsen)
- Nunani Avannarlerni Siunnersooqatigiit Meeqqanut Inuusuttunullu atuakkiortunut
- nersornaasiuttagaat: Atuagaq Pipa Sulullu Qaangiipput atuakkiortumit Naja Rosing-Asvidimit atuakkiarineqartoq
- Nunani Avannarlerni Siunnersooqatigiit Filmiliortartunut nersornaasiuttagaat: Alanngut Killinganni, qiaamminartuliaq Malik Kleistimit allanneqarlunilu ilitsersorneqartoq
- Nunani Avannarlerni Siunnersooqatigiit Atuakkiortunut nersornaasiuttagaat: Atuagaq Qivittuissuit Akornanniinnikuuvunga Katrine Rasmussen Kielsenimit atuakkiarineqartoq
- Innersuussinerit taakku ajasoornartut Kalaallit Nunaanni Nunanilu Avannarlerni tamani tupinnaannartumik piginnaasaqarnerit aallussinerillu takutitsiffigaat. Oslo Operaenimi ulloq 31. oktoberimi pisussat malinnaaviginissaat qilanaaraagut, tassani ajugaasut nunani avannarlerni kulturikkut kingornussanut tapeeqataanertik pillugu nalliuttorsiutigineqassammata, NAPA allappoq.
Innersuunneqartunut nassuiaatit Nunani Avannarlerni Siunnersuisoqatigiit nittartagaanni atuarsinnaavatit.
Atuakkiortoq Niviaq Korneliussen atuakkiani "Naasuliardarpi" pillugu atuakkiortunut nersornaammik 2021-mi nersornaaserneqarpoq, 2018-mi Attumi piniartut aalisartullu avatangiisinut nersornaammik, aamma ICC avatangiisinut nersornaammik 1996-imi nersornaaserneqarput.