Nunanit tamalaaneersut atuakkamik saqqummersitsineranni kalaaleq inuusuttoq saqqummersitseqataasoq
Atuakkami inuusuttut 14-it nunanit assigiinngitsunit arfineq marlunneersut tamarmik ataatsimik allaaserinnipput, allaaseralugit inuussuttut atukkaminni unammillernartitatik taamatuttaaq siunnersuusiorfigalugu qanoq iliornikkut najukkani ajornartorsiutit qaangerniarneqarsinnaanersut.
17-nik ukiulik Nuummeersoq Seqininnguaq Lynge Poulsen ulluni makkunani New York-imiippoq FN-ip Nunat Inoqqaavinut Ataavartumik Oqaloqatigiittarfianni peqataalluni. Atuakkioqataanini aallaavigalugu FN-imut oqalugiariartoqqusaalluni aggersarneqarsimalluni.
Allannguisoqartoqartariaqarpoq
Seqininnguaq Lynge Poulsen issittormiut sinniisuuffigalugit allaaserisaqarpoq, qulequtsersimasaminik ”Nødvendigheden af at bryde tabuer”. Allaaserisamini inuusuttut Kalaallit Nunaanni atugaat sammivai.
- Inussuttorpassuit imminnut toquttarput persuttagaaneq artornartullu allat aqqusaartarlugit. Ajoraluartumilli allaannginnami atukkat taamaattussaannartut isigineqalersimasut, taamaattumik qaangerumallugit qanoq iliuuseqarfigineqartariaqalerput, Seqininnguaq Lynge Poulsen tusagassiutinut nalunaarummi oqarpoq.
Assilialiortoq
Taassuma saniatigut atuakkamut Seqininnguaq Lynge Poulsen saqqaliortuuvoq, saqqaatigut kikkut tamarmik oqaluttuassaqartuunerat nalunaarutigalugu, taamatuttaaq nunap inoqqaavi suminngaaneeraluarunik tamarmik misigissutsiminnik annissassaqarusuttut, soorluttaaq qanorluunniit assigiinngisitaartigigaluarutta immitsinnut paaraluta illersoqarigiittariaqartugut oqariartuutigalugu.
Global Indigenous "Youth through their eyes” – ”Nunap Inoqqaavisa Inuusuttasa – isaanit”. Atuagaq saqqummersinneqarpoq FN-imi ippassaq sisamanngornermi.
Atuakkap saqqummersinneqarneranut atatillugu Seqininnguaq FN-imi oqalugiartinneqassaaq, tusagassiorfinnillu apersorneqassalluni, ilaatigullu allaaserisaa atuagassiami ”Teen Vogue”-mi saqqummersinneqassaaq.