Nunarsuarmi katersugaasivik anginerpaaq Qaqortumi
Qaqortup Katersugaasiviata nunarsuarmi katersugaasivik tusaamasaanerpaaq, The Smithsonian Washingtonimi inissisimasup qanimut suleqatigileruttorpaa. Qanimut suleqatigiineq piviusunngorsinnaasimavoq Qaqortumi katersugaasiviup timmisartortartoq Charles Lindbergh 1933-mi Nunatsinni angalaneraniit ukkatarinninnerasigut.
Qaqortumi katersugaasivik Facebook aqqutigalugu ualimut nalunaaqutaq 16.00 toqqaannartumik takornartitsiniarpoq. Tassani nunarsuarmi katersugaasiviup annerpaap, The Smithsonian qanimut suleqatigineqarnera malunnartinneqassaaq. Qaqortumimi katersugaasivik ilanngutassianik arfineq-pingasunik qupperneqartunik amerikamiuni 1933-mi nunatsinniineraniit katersugaasivissuarmiit pissarsisimapput.
- The Smithsonian aamma Qaqortup Katersugaasivia suleqatigiisinnaanerat assut tulluusimaarutigaarput. Nunarsuarmi katersugaasivik annerpaaq aammalu pitsaanerpaaq suleqatigisinnaallugu qungujunnanngitsuunngilaq, Dan Ullerup, Qaqortumi Katersugaasivimmi pisortaq oqarpoq.
Timmisartortartup alapernaatsup Charles Lindberghip 1933-mi angalanera samminerisigut The Smithsonianip aamma Qaqortup katersugaasiviata suleqatigiineranut piviusunngortitsisuuvoq. Katersugaasivissuumi Lindberghip timmisartorisimasaa, Tingmissartoq, katersugaasivimminni saqqummerseqqavaat.
Allagaatit quppernerit arfineq-pingasut
Allagaatit quppernerit arfineq-pingasut Qaqortup Katersugaasiviata katersugaasivissuarmiit pissarsiarisimavai. Tassani Lindberghip Nunatsinni angalaneraniit allagaatit imaqarput. Amerikamiut kalaallinik naapitseqqaarnerat allagaatini atuarneqarsinnaapput, nuannersumillu kalaallit, Kalaallillu Nunaat eqqartorneqarput:
- Kalaallit inussiarnisaartarnerat Kalaallillu Nunaat qanoq kusanartiginersoq nunarsuarmi katersugaasivimmi annerpaami taaneqarpat, taava inuppassuarnit takuneqarumaarpoq. Corona qaangiussimalerpat Kalaallit Nunaanut Qaqortumillu angalarusuttut amerlanerulernissaat neriuuteqarfigaarput, Dan Ullerup oqarpoq.
Facebookikkut takutsitsinerup saniatigut allagaatit The Smithsonian-eersut aamma Qaqortup Katersugaasiviata Facebookiani saqqummiunneqassapput.