Nunat Avannarliit Islandimiut oqaluttuaatitoqaannut aningaasaliipput
Nunat Avannarliit kulturikkut aningaasaateqarfiat islandimiut oqaluttuaatitoqaasa norskisut, svenskisut danskisullu nutserneqarnissaannut 300.000 kr.-inik aningaasaliivoq.
Oqaluttuaatitoqqat 40-t nunat avannaamioqatigiit ataatsimoorussamik kingornussaanni pisut pingaaruteqarnerpaartaasa ilaattut isiginiarneqartartut oqaatsit nalinginnaasut atorlugit kinguaassanut siammarterneqassapput. Suliniut Nunani Avannarlerni nutserititsinermik suliniutit ataasiartat maannamut annertunersaraat, aningaasartuusissatut missingersuutitn17 mio. nkr.-iullutik.
Islandimiut saqqummersitsiviata pisussamut atatillugu pilersinneqarsimasup aammalu naleqqulluartumik Saga Forlag-imik ateqartup atuagarsuit nunat avannaliit oqaasiinut pingasunut nutserneqarnissaa angunialersimavaa. Suliniut annertoorujussuuvoq, ukiuni sisamani ingerlanneqartussaalluni. nunat Avannarliit Kulturikkut Aningaasaateqarfianit tapiissutit aningaasartuutinut ukiuni siullernut marlunnut aningaasartuutit ilaannut atugassaapput, nutaarsiassanik siammarterisartoq Norden i Dag allappoq.
Islandimiut oqaluttuaatitoqaat ukioq 930-imiit 1030-imut Islandimi ilaqutariissuarnik pingaaruteqarnerpaanik sapiitsuliortuarsuanngorlugit oqaluttuarinninnerusut aatsaat 1200-kut ingerlaneranni allattugaatigilerneqarsimapput. Oqaaseq "Saga" islandimiusut oqaluttuamut sumulluunniit atorniarneqartarpoq, aammalu oqaatsimut "oqaluttuarisaaneq"mut atorneqakkajuttarluni.
Saqqummersitsereernerup kingorna nutsernerit tamakku internetimi digitalinngorlugit saqqummersinneqassapput, quppernermi taaguutilimmi www.saganet.is-imi, oqaluttuaatitoqqat taakku siunissami kinguaassanut tunngatillugu atuarneqarsinnaasunngortinnniarlugit. Suliniut manna saga-t tuluttuumut nutsertinneqarneranni - suliaq taanna aamma Nunat Avannarliit Kulturikkut aningaasaateqarfimmit aningaasaliiffigineqarpoq - iluatsilluartumit isumassarsissutaavoq.